Kısmet-i Askeriye Mahkemesi 19 Numaralı Sicil (H. 1109-1110 / M. 1698-1699) cilt: 58, sayfa: 455 Hüküm no: 330 Orijinal metin no: [83b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Saraç Mercan Mehmed Çelebi’nin vefat eden Saraç Mehmed Çelebi’de alacağı olduğunu ispat ettiği Mahmiye-i İstanbul’da Laleliçeşme kurbünde sâkin olup mahrûse-i Edirne’de müsâfiren vefât eden Saraç Mehmed Çelebi b. Receb b. Abdullah’ın verâseti vâlidesi Hadîce bt. Abdullah’a ve li-ebeveyn ammi oğlunun oğlu Ali Beşe b. Arslan’a münhasıra oldukdan sonra sarrâc tâifesinden olup mahmiye-i mezbûrede Suhte Sinan mahallesinde sâkin Mercan Mehmed Çelebi b. Receb mahfil-i kazâda müteveffâ-yı mezbûrun terekesine bi’l-verâse vaz‘-ı yed eden mezbûr Ali Beşe mahzarında üzerine da‘vâ ve takrîr-i kelâm edip müteveffâ-yı mezbûr Mehmed Çelebi b. [Receb] b. Abdullah zimmetinde yedimden müşterâ ve makbûz sarrâc metâ‘ı bahâsından ba‘de küllî hesâb otuz bin sağ akçe hakkım olup hattâ müteveffâ-yı mezbûr hâl-i kemâl-i sıhhatinde cihet-i mezbûreden bana ol kadar akçe zimmetinde lâzımü’l-edâ deyni olduğunu huzûr-ı Müslimînde ikrâr ve işhâd dahi edip kable’l-edâ fevt olmağla terekesinden taleb ederim suâl olunup alıverilmesi matlûbumdur dedikde gıbbe’s-suâl ve akībe’l-inkâr müdde‘î-i mezbûrdan sıdk-ı makāline muvâfık beyyine taleb olund[ukda] udûl-ı Müslimînden sarrâc tâifesinden Mehmed Çelebi b. Mustafa ve Hüseyin Çelebi b. Osman li-ecli’ş-şehâde meclis-i şer‘a hâzırân olup isre’l-istişhâd fi’l-hakīka müteveffâ-yı mezbûr Saraç Mehmed Çelebi b. Receb b. Abdullah hâl-i sıhhatinde işbu müdde‘î-i mezbûr Mercan Mehmed Çelebi yedinden iştirâ ve kabz eylediğim sarrâc metâ‘ı bahâsından otuz bin sağ akçe ba‘de’l-hesâb zimmetimde deynim vardır deyü huzûrumuzda ikrâr ve bizi işhâd eyledi biz bu husûsa şâhidleriz ve şehâdet dahi ederiz deyü her biri edâ-i şehâdet-i şer‘iyye edip ba‘de’t-ta‘dîl ve’t-tezkiye şehâdetleri makbûle olmağın gıbbe’t-tahlîfi’ş-şer‘î mûcebiyle ba‘de’l-hükm mâ-vaka‘a bi’t-taleb ketb olundu. Hurrire fî 5 min-Rebî‘i’l-âhir li-seneti aşer ve mi’ete ve elf. Şuhûdü’l-hâl: Ahmed Çelebi b. Mehmed, Mehmed Çelebi b. Mustafa, Hüseyin Çelebi b. Osman, Saraç Ahmed Çelebi b. Ramazan, Yahya Efendi b. Mustafa.