Kısmet-i Askeriye Mahkemesi 19 Numaralı Sicil (H. 1109-1110 / M. 1698-1699) cilt: 58, sayfa: 454 Hüküm no: 329 Orijinal metin no: [83a-4] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Mehmed adlı çocuğun vasisi Muammer Hatun’un önceki vasi Hasan Çelebi’den çocuğa ait eşya ve paraları teslim aldığı Mahmiye-İstanbul’da Koruk Mahmud mahallesi sâkinelerinden olup zâtı Saraç Doğan mahallesinden el-Hâc Abdülkerim b. Cafer ve Ebubekir Çelebi b. Ömer ta‘rîfleriyle mu‘arrefe olan Muammer Hatun bt. Abdullah mahfil-i kazâda zikr olunan Saraç Doğan mahallesi sükkânından hâfızü’l-kitâb Hasan Çelebi b. Hüseyin mahzarında ikrâr ve takrîr-i kelâm edip hâlâ vasiye-i mansûbesi olduğum Mehmed b. Ahmed nâm sagīrin mezbûr Hasan Çelebi benden mukaddem vasiyy-i mansûbu olmağla sagīr-i mezbûrun vâlidesi Şahbaz bt. Abdullah terekesinden sagīr-i mezbûra isâbet eden yetmiş guruşu ve sagīr-i mezbûrun li-ebin ammisi Pastırmacı el-Hâc Şa‘bân vefât eyledikde sülüs-i malından sagīr-i mezbûra vasiyet eylediği guruş cem‘an yüz yetmiş guruş makbûzu olmağla vesâyet-i mezbûre[den] kasr-ı yed etmekle azlolundukda makbûz-ı hesâbı görüldükde(?) işbu nafaka hücceti mûcebince yevmî sekizer sağ akçe nafaka-i mefrûzadan senede doksan altı guruş masrûfu ihrâc ve yedinde mütebâkī yetmiş dört guruşun altmış guruşunu nakden işbu meclisde tamâmen yedinden alıp kabz eyledim ve mecmû‘u on üç guruş kıymetli sagīr-i mezbûra vâlidesi terekesinden isti‘mâl içün alıkonulan eşyâyı dahi tamâmen alıp kabz eyledim sagīr-i mezbûrun mal-ı müntakilinden vasiyy-i sâbık-ı mezbûr zimmetinde bir akçe ve bir habbe kalmadı dedikde gıbbe’t-tasdîkı’ş-şer‘î kayd-şüd. Hurrire fî 2 min-Rebî‘i’l-âhir li-seneti aşer ve mi’ete ve elf. [Şuhûdü’l-hâl]: Mehmed Efendi b. el-Hâc İbrahim, el-Hâc Abdurrahman b. Cafer, İbrahim Çelebi b. Mustafa, Ebubekir Çelebi b. Ömer, es-Seyyid Abdullah Efendi b. es-Seyyid Mustafa, Halil Çelebi b. Mehmed, Ahmed Çelebi b. Şeyhzâde.