Bab Mahkemesi 46 Numaralı Sicil (H. 1096 - 1097 / M. 1685 - 1686) cilt: 19, sayfa: 631 Hüküm no: 784 Orijinal metin no: [141b-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Yani ve eşi Zoli’nin taksitli borçlarının hemen ödenmesi için tazyik edilmemeleri Düstûr-ı mükerrem müşîr-i müfahham, nizâmü’l-âlem, müdebbir-i umûri’l-cumhûri bi’l-fikri’s-sâkıb, mütemmim-i mehâmmi’l-enâmi bi’r-re’yi’s-sâib, mümehhid-i bünyâni’d-devleti ve’l-ikbâl, müşeyyid-i erkâni’s-sa‘âdeti ve’l-iclâl el-mahfûfu bi sunûfi’l-meliki’l-a‘lâ Âsitâne-i sa‘âdetimde sadâret-i uzmâ ve vekâlet-i kübrâ kāimmakāmı olan vezîrim Receb Paşa -edâmallâhu te‘âlâ iclâlehû- ve akzâ kuzâti’l-müslimîn evlâ vülâti’l-muvahhidîn, ma‘denü’l-fazli ve’l-yakīn, hüccetü’l-hakkı ale’l-halkı ecma‘în, vârisü ulûmi’l-enbiyâ’i ve’l-mürselîn, el-muhtas bi mezîdi inâyeti’l-meliki’l-Mu‘în Mevlânâ İstanbul kadısı -zîdet fezâilühû- tevkī‘-i refî‘-i hümâyûn vâsıl olucak ma‘lûm ola ki Yani nâm zimmî ve zevcesi Zoli nâm nasrâniye Ordu-yı hümâyûnuma arzuhâl edip ba‘zı kimesnelere bir mikdâr deyni ve ba‘zılarda alacağı olup aldıkça erbâb-ı düyûna tedrîcli vermeğe râzılar iken def‘aten talebiyle rencîde eylediklerin bildirip hilâf-ı şer‘-i şerîf ol vechile te‘addîleri men‘ ü def‘ olunmak bâbında hükm-i hümâyûnum recâ eylemeğin hilâf-ı şer‘-i şerîf rencîde olunmamak emrim olmuşdur. Buyurdum ki hükm-i şerîfimle vusûl buldukda bu bâbda sâdır olan emrim üzre ol vechile dahl, mukaddemâ bir def‘a şer‘le görülüp fasl olunmayan husûsları tamâm hak ve adl üzre mukayyed olup göresin arz olunduğu üzre ise ol bâbda muktezâ-yı emr-i şer‘-i kavîmle amel edip dahi alacakların aldıkça erbâb-ı düyûna deynlerin edâ eylediklerinden sonra def‘aten talebiyle rencîde ve remîde ettirmeyesiz min ba‘d şer‘-i şerîfe ve emr-i hümâyûnuma muhâlif kimesneye iş ettirmeyesiz şöyle bilesiz alâmet-i şerîfe i‘timâd kılasız. Tahrîren fî evâsıtı şehri Recebi’l-ferd sene seb‘a ve tis‘în ve elf. Be yurd-ı sahrâ-yı Kemal Çayırı.