Kısmet-i Askeriye Mahkemesi 19 Numaralı Sicil (H. 1109-1110 / M. 1698-1699) cilt: 58, sayfa: 466 Hüküm no: 340 Orijinal metin no: [85a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. İsmail’in vefat eden Saraç Solak Mehmed Çelebi’de alacağı olduğunu ispat ettiği Kezâlik mezbûr İsmail Efendi mahmiye-i İstanbul’da Kuyumcu Bahşayiş mahallesinde sâkin el-Hâc Mustafa b. el-Hâc Mehmed’in menziline varıp zeyl-i vesîkada muharrerü’l-esâmî Müslimîn huzûrlarında akd-i meclis-i şer‘-i şerîf ettikde medîne-i hazreti Ebâ Eyyûb-ı Ensârî -radiyallâhu te‘âlâ rabbühü’l-Bârî- kapısı dâhilinde Tokludede mahallesinde sâkin el-Hâc İsmail b. Mehmed meclis-i ma‘kūd-ı mezbûrda zikr olunan Kuyumcu Bahşayiş mahallesi ahâlîsinden olup bundan akdem mahrûse-i Edirne’de misâfiren vefât eden Saraç Solak Mehmed Çelebi b. Receb’in vâlidesi ve terekesine bi’l-verâse vaz‘-ı yed edip zâtı zikr olunan Kuyumcu Bahşayiş mahallesinde sâkin Hoca İbrahim Efendi b. Mehmed ve Veled-i Karabaş mahallesinde sâkin Abdi Çelebi b. Mehmed ta‘rîfleriyle mu‘arrefe olan <<Âişe>> Hadîce Hatun bt. Abdullah mahzarında üzerine da‘vâ ve takrîr-i kelâm edip işbu yedimde olan mümzâ ve mahtûm deyn temessüğü mûcebince müteveffâ-yı mezbûr Saraç Mehmed Çelebi b. Receb b. Abdullah zimmetinde sarrâc metâ‘ı semeninden ba‘de külli’l-hesâb beş yüz guruş hakkım olup meblağ-ı mezbûru kable’l-edâ fevt olmağla terekesinden taleb ederim suâl olunsun dedikde mezbûre Hadîce Hatun cevâbında terekeye vech-i muharrer üzere vaz‘-ı yedini ikrâr ve müdde‘î-i mezbûrun vech-i muharrer üzere müdde‘âsını inkâr edicek müdde‘î-i mezbûrdan [85b] sıdk-ı makāline beyyine taleb olundukda udûl-ı ahrâr-ı ricâl-i Müslimînden mahmiye-i mezbûrede Cafer Ağa mahallesinde sâkin Osman Çelebi b. Şa‘bân ve Hamamcı Muhyiddin mahallesinde sâkin Mehmed Çelebi b. Murad li-ecli’ş-şehâde meclis-i ma‘kūd-ı mezkûra hâzırân olup istişhâd olunduklarında fi’l-hakīka müteveffâ-yı mezbûr Saraç Mehmed Çelebi b. Receb b. Abdullah işbu müdde‘î-i mezbûr el-Hâc İsmail yedinde olan mümzâ ve mahtûm deyn temessüğü mûcebince sarrâc metâ‘ı semeninden ba‘de küllî hesâb merkūm el-Hâc İsmail’e zimmetinde beş yüz guruş deyni olduğunu huzûrumuzda ikrâr ve bizi işhâd eyledi biz bu husûsa bu vech üzere şâhidleriz şehâdet dahi ederiz deyü her biri edâ-i şehâdet-i şer‘iyye ettikde ba‘de’t-ta‘dîl ve’t-tezkiye şehâdetleri makbûle olmağın gıbbe’t-tahlîf mûcebince ba‘de’l-hükm vâki‘ hâli mevlânâ-yı mezbûr mahallinde ketb ü tahrîr ba‘dehû ma‘an ba‘s olunan Hasan Çelebi b. Abdullah ve Mehmed b. Ahmed ile meclis-i şer‘a gelip vukū‘u üzere inhâ ve takrîr etmeğin mâ-vaka‘a bi’t-talebi’ş-şer‘î mâ-vaka‘a kayd. [Fî]-gurreti Rebî‘i’l-âhir li-seneti aşer ve mi’ete ve elf. Şuhûdü’l-hâl: Mehmed Ağa b. Hüseyin, el-Hâc Mustafa b. Mehmed, Ahmed Çelebi b. Ali, Mehmed Çelebi b. Receb, Osman Çelebi b. Şa‘bân, Mehmed Çelebi b. Murad.