Kısmet-i Askeriye Mahkemesi 19 Numaralı Sicil (H. 1109-1110 / M. 1698-1699) cilt: 58, sayfa: 465 Hüküm no: 339 Orijinal metin no: [85a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Abdullah Efendi’nin vefat eden Mustafa Odabaşı’nın kendisini vasiyetini yerine getirmek ve küçük kızı Ayşe’nin işlerini yürütmek üzere vasi tayin ettiğini ispat ettiği Husûs-ı âti’l-beyânın mahallinde istimâ‘ ve tahrîri iltimâs olunmağın savb-ı şer‘den Mevlânâ es-Seyyid İsmail Efendi b. es-Seyyid Ahmed Efendi mahmiye-i İstanbul’da Keçeci Pîrî mahallesinde sâkin iken bundan akdem vefât eden Mustafa Odabaşı b. Ahmed’in menziline varıp zeyl-i kitâbda muharrerü’l-esâmî Müslimîn huzûrlarında akd-i meclis-i şer‘-i şerîf ettikde müteveffâ-yı mezbûrun vech-i âtî üzere vasiyy-i muhtârı olduğunu iddi‘â eden mahalle-i mezbûrede sâkin hâfızü’l-kitâb Abdullah Çelebi b. Mehmed meclis-i ma‘kūd-ı mezbûrda müteveffâ-yı mezbûrun zevce-i menkûha-i metrûkesi olup zâtı mahalle-i mezbûre ahâlîsinden el-Hâc Mehmed Efendi b. Süleyman ve el-Hâc İbrahim b. el-Hâc Mustafa ta‘rîfleriyle mu‘arrefe olan Emine Hatun [bt.] Abdullah mahzarında üzerine da‘vâ ve takrîr-i kelâm edip müteveffâ-yı [mezbûr] Mustafa Odabaşı b. Ahmed b. Abdullah fevtinden üç gün mukaddem bi-emrillâhi te‘âlâ fevt olduğumda cemî‘ terekemden vech-i mesnûn üzere levâzım-ı techîz ve tekfînim görüle ve bâkī malımın sülüsü ifrâz olunup sülüs-i mezbûrdan iskāt-ı salâtım görüle ve tabh-ı ta‘âm [ve] it‘âm-ı fukarâ ve sulehâ oluna ve fazla kalırsa senin re’y ve ma‘rifetinle sâir vücûh-ı birre harc ü sarf oluna deyü vasiyet edip tenfîzine ve kızı Âişe nâm sagīrenin vakt-i rüşd ü sedâdına varınca tesviye-i umûruna huzûr-ı Müslimînde beni vasiyy-i muhtâr nasb ü ta‘yîn edip ben dahi muvâcehesinde kabûl edip ve musırran-aleyh fevt oldukda tenfîz-i vesâyâ murâd eylediğimde mezbûre Emine mâni‘a olur suâl olunsun dedikde gıbbe’s-suâl ve’l-inkâr müdde‘î-i mezbûrdan sıdk-ı makāline beyyine taleb olundukda udûl-ı ahrâr-ı ricâl-i Müslimînden olup mahalle-i mezbûre ahâlîsinden Ahmed Efendi b. Abdülaziz ve İbrahim Çelebi b. el-Hâc Mustafa ve Mustafa Çelebi b. Nurullah li-ecli’ş-şehâde meclis-i ma‘kūd-ı mezbûra hâzırûn olup istişhâd olunduklarında fi’l-hakīka müteveffâ-yı mezbûr Mustafa Odabaşı b. Ahmed b. Abdullah fevtinden üç gün mukaddem bi-emrillâhi te‘âlâ fevt olduğumda cemî‘ terekemden vech-i mesnûn üzere techîz ve tekfînim görüle ve bâkī malımın sülüsü ifrâz olunup sülüs-i mezbûrdan iskāt-ı salâtım görüle ve eyyâm-ı mübârekede tabh-ı ta‘âm ve it‘âm-ı fikarâ oluna ve fazla kalırsa senin re’y ve ma‘rifetinle sâir vücûh-ı birre harc ü sarf oluna deyü vasiyet edip tenfîzine ve kızı Âişe nâm sagīrenin vakt-i rüşd ü sedâdına değin tesviye-i umûruna <> işbu müdde‘î-i mezbûr Abdullah Çelebi b. Mehmed’i huzûrumuzda vasiyy-i muhtâr ol dahi muvâcehesinde ba‘de’l-kabûl musırran-aleyh vefât eyledi biz bu husûsa bu vech üzere şâhidleriz şehâdet dahi ederiz deyü her biri edâ-i şehâdet-i şer‘iyye edip ba‘de’t-ta‘dîl ve’t-tezkiye şehâdetleri makbûle olmağın mûcebince ba‘de’l-hükm vâki‘ [hâli] mevlânâ-yı mezbûr mahallinde ketb ü tahrîr ba‘dehû ma‘an ba‘s olunan Hasan b. Abdullah ve Mehmed b. Ahmed ile meclis-i şer‘a gelip alâ-vukū‘ihi inhâ ve takrîr etmeğin mâ-vaka‘a bi’t-taleb ketb kayd-şüd. Fî 3 min-Rebî‘i’l-âhir li-seneti aşer ve mi’ete ve elf. Şuhûdü’l-hâl: Müftîzâde Mehmed Efendi b. Mehmed Efendi, Mustafa Efendi b. Mehmed Efendi, Fazlı Ağa b. Mehmed, Halil Efendi b. Ali, Osman Efendi b. Ali, Abdülbaki Efendi b. Ali, Ali b. Hasan, Ahmed b. Mehmed.