Kısmet-i Askeriye Mahkemesi 19 Numaralı Sicil (H. 1109-1110 / M. 1698-1699) cilt: 58, sayfa: 487 Hüküm no: 357 Orijinal metin no: [89a-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Ebubekir Efendi’nin vefat eden Başbaltacı Hüseyin Bey’in oğlu Mustafa’ya vasi tayin edildiği Mahrûse-i Galata muzâfâtından kasaba-i Tophane’de Avni Efendi mahallesi ahâlîsinden olup bundan akdem mahrûse-i Edirne’de misâfiren fevt olan Saray-ı cedîd-i şehriyârîde Başbaltacı Hüseyin Bey b. Hamza’nın bâliğ-i gayr-ı reşîd oğlu Mustafa Çelebi’nin tesviye-i umûruna bir vasî nasbı lâzım ve mühim olmağın emânet ve diyânet ile ma‘rûf olup mahmûdü’l-hâl olduğu zeyl-i kitâbda muharrerü’l-esâmî Müslimîn haberleri ile lede’ş-şer‘i’l-enver zâhir olan zikr olunan Avni mahallesi ahâlîsinden işbu râfi‘ü’l-kitâb bostânî mütekā‘idlerinden Ebubekir Efendi b. Mustafa’yı hâkim-i muvakkı‘-i sadr-ı kitâb tûbâ-lehû ve hüsnü-meâb efendi hazretleri gayr-ı reşîd olan mezbûr Mustafa’nın kemâl-i akl-ı rüşdüne varınca tesviye-i umûruna vasî nasb ü ta‘yîn buyurduklarında ol dahi vesâyet-i mezbûreyi kabûl ve merâsimini edâya müte‘ahhid olmağın mâ-vaka‘a kayd-şüd. Hurrire fî 7 min-Rebî‘ülâhir sene 1110 Şuhûdü’l-hâl: İbrahim Efendi [b.] Hüseyin, Osman Bey b. Süleyman, Ali Usta b. ( ), Mustafa b. Murtaza.