Kısmet-i Askeriye Mahkemesi 19 Numaralı Sicil (H. 1109-1110 / M. 1698-1699) cilt: 58, sayfa: 487 Hüküm no: 358 Orijinal metin no: [89b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Müderris Mehmed Efendi’nin müteveffa Bostancı Abdüsselam’da alacağı olduğunu ispat ettiği Husûs-ı âti’l-beyânın mahallinde istimâ‘ ve tahrîri iltimâs olunmağın savb-ı şer‘-i enverden me’zûnen irsâl olunan Mevlânâ el-Hâc Abdurrahim Efendi b. Mustafa mahmiye-i İstanbul’da Hadîka-i hâssa-i şehriyârîden kuşçubaşı olanlara mahsûs mevzi‘a varıp zeyl-i kitâbda muharrerü’l-esâmî Müslimîn huzûrlarında akd-i meclis-i şer‘-i şerîf ettikde mahmiye-i mezbûrede Bahçekapı kurbünde Vanî Efendi medresesinde sâkin olup bundan akdem Rumeli’nde Ülgün kasabasında fevt olan bostânî mütekā‘idlerinden Abdüsselam b. Ahmed b. Abdullah nâm kimesnenin zâhirde vâris-i ma‘rûfu olmayıp cemî‘ terekesi cânib-i beytülmâle âid oldukdan sonra zikr olunan Bahçekapısı kurbünde Elvanzâde mahallesi ahâlîsinden fahrü’l-müderrisîni’l-kirâm hâfızü’l-kitâb Mehmed Efendi b. Davud meclis-i ma‘kūd-ı mezkûrda hadîka-i mezbûrede hâlâ bostancıbaşı ve tâife-i mezbûrenin beytülmâllerini kabza taraf-ı Saltanat-ı aliyye’den bâ-hatt-ı hümâyûn-ı sa‘âdet-makrûn memûr olmağla tereke-i müteveffâ-yı mezbûra bi’l-emâne vaz‘-ı [yed] eden umdetü’l-havâs ve’l-mukarrebîn izzetlü Mustafa Ağa b. Hüseyin b. Mehmed’in kuşçubaşısı ve tarafından husûs-ı âti’l-beyânda müseccel vekîli ve kıbel-i şer‘den husûmet ve redd-i cevâba me’zûn olan fahrü’l-akrân Osman Bey b. Süleyman mahzarında üzerine da‘vâ ve takrîr-i kelâm edip müteveffâ-yı mezbûr Abdüsselam b. Ahmed b. Abdullah zimmetinde cihet-i karzdan altmış iki yaldız altını hakkım olup meblağ-ı mezbûru kendi mesârifine sarfla istihlâk edip hattâ hâl-i hayâtında bin yüz Şa‘bânı gurresinde huzûr-ı Müslimînde ikrâr ve işhâd edip kable’l-edâ fevt olmağla terekesinden taleb ederim suâl olunsun dedikde gıbbe’s-suâl ve’l-inkâr müdde‘î-i mezbûrdan sıdk-ı makāline beyyine taleb olundukda udûl-ı ahrâr-ı ricâl-i Müslimînden mahmiye-i mezbûrede Sultanbayezid civârında sâkin Mehmed Bey b. Hasan ve Mahmud Bey b. Hüseyin li-ecli’ş-şehâde meclis-i ma‘kūd-ı mezbûra hâzırân olup istişhâd olunduklarında fi’l-vâki‘ müteveffâ-yı mezbûr Abdüsselam b. Ahmed b. Abdullah hâl-i hayâtında bin yüz Şa‘bânı gurresinde müdde‘î-i merkūm Mehmed Efendi b. Davud’a cihet-i karzdan zimmetimde vâcibü’l-edâ altmış iki yaldız altını deynim vardır deyü huzûrumuzda ikrâr ve bizi işhâd eyledi biz bu husûsa bu vech üzere şâhidleriz şehâdet dahi ederiz deyü her biri edâ-i şehâdet-i şer‘iyye edip ba‘de’t-ta‘dîl ve’t-tezkiye şehâdetleri makbûle olmağın gıbbe’t-tahlîfi’ş-şer‘î mûcebiyle ba‘de’l-hükm vâki‘ hâli mevlânâ-yı mezbûr mahallinde ketb [ü] tahrîr ba‘dehû ma‘an ba‘s olunan Hasan Çelebi b. Abdullah ve Mehmed b. Ahmed ile meclis-i şer‘a gelip vukū‘u üzere inhâ etmeğin mâ-vaka‘a kayd-şüd. Hurrire fî 7 min-Rebî‘ülâhir sene 1110 Şuhûdü’l-hâl: Ali Ağa b. Mehmed mütekā‘id bostânî, İbrahim Efendi b. Hüseyin, el-Hâc İbrahim b. Mehmed, Hasan Usta b. Ali, Münir Ağa b. Mehmed.