Kısmet-i Askeriye Mahkemesi 19 Numaralı Sicil (H. 1109-1110 / M. 1698-1699) cilt: 58, sayfa: 503 Hüküm no: 374 Orijinal metin no: [92b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Müteveffa Ali’nin yetimlerine nafaka takdir edildiği Mahmiye-i İstanbul’da Zeyrek mahallesinde sâkin iken bundan akdem vefât eden el-Hâc Ali b. Mehmed’in sulbî sagīr oğlu Mustafa ve sulbiye sagīre kızı Hadîce’nin vâlideleri ve hâdineleri bâ‘isetü’l-kitâb Ümmühani Hatun bt. Abdullah’ın zâtı bade’t-ta‘rîfi’ş-şer‘î meclis-i şer‘-i hatîr-ı lâzımü’t-tevkīrde takrîr-i kelâm ve ta‘bîr ani’l-merâm edip hâdineleri olduğum sagīrân-ı mezbûrâna babaları müteveffâ-yı mezbûrdan müntakil mallarından kadr-ı ma‘rûf nafaka ve kisve-bahâ farz ve takdîr olunmak murâdımdır dedikde mezbûre Ümmühani’nin kelimât-ı meşrûhası vâkı‘a mutâbık olmağla hâkim-i muvakkı‘-i sadr-ı kitâb efendi hazretleri târîh-i kitâbdan para üçer akçe hesâbınca sagīr-i mezbûr Mustafa’ya yevmî on akçe ve sagīre-i mezbûreye yevmî beş akçe nafaka ve kisve-bahâ farz ve takdîr edip meblağ-ı mefrûz-ı mezbûru sagīrân-ı mezbûrân[ın] nafaka ve kisve-bahâlarına harc ü sarfa ve vakt-i zarûretde istidâneye ve lede’z-zafer mallarına rücû‘a mezbûre Ümmühani Hatun’a izin vermeğin mâ-vaka‘a kayd-şüd. Fî 15 Ramazan sene 1109 Şuhûdü’l-hâl: Fahrü’l-eimme Kadri Efendi, eş-Şeyh Mustafa Efendi, Eyüb Çelebi b. el-Hâc Ali, Hüseyin Çelebi b. Mehmed, Hüseyin Çelebi b. İsmail, Hasan Beşe b. Abdullah.