Kısmet-i Askeriye Mahkemesi 19 Numaralı Sicil (H. 1109-1110 / M. 1698-1699) cilt: 58, sayfa: 503 Hüküm no: 373 Orijinal metin no: [92b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Müteveffa Arabacılar kethüdası Ahmed Ağa’nın küçük oğlu Ali’ye nafaka takdir edildiği Mahmiye-i İstanbul’da Mimârayas mahallesinde sâkin iken bundan akdem vefât eden Arabacılar kethüdâsı Ahmed Ağa b. Ali’nin sulbî sagīr oğlu Ali’nin vâlidesi ve hâdinesi olup zâtı ta‘rîf-i şer‘î ile mu‘arrefe işbu hâfızatü’l-kitâb Havva bt. Abdullah mahfil-i kazâda takrîr-i kelâm edip oğlum sagīr-i mezbûr Ali’nin nafaka ve kisveye eşedd-i ihtiyâcı olmağın babası müteveffâ-yı mezbûrdan müntakil hisse-i irsiyesinden kadr-ı ma‘rûf nafaka ve kisve-bahâ farz ve takdîr olunmak matlûbumdur dedikde hâzıne-i mezbûrenin kelimât-ı meşrûhası vâkı‘a mutâbıka idiği lede’ş-şer‘i’l-enver zâhir ve mukarrer olmağla hâkim-i muvakkı‘-i sadr-ı kitâb tûbâ-lehû ve hüsnü-meâb efendi hazretleri para üçer akçeye olmak üzere mal-ı müntakilinden yevmî sekizer akçe nafaka ve kisve-bahâ farz ve takdîr buyurup meblağ-ı mefrûz-ı mezbûr yevmî sekizer akçeyi levâzım-ı zarûre-i sagīr-i mezbûra harc ü sarfa ve inde’z-zarûre istidâneye ve lede’z-zafer malına rücû‘a mezbûre Havvaza [Havva’ya] izin birle mâ-vaka‘a kayd-şüd. Fî gurre-i Rebî‘ülahir li-seneti 1110 Şuhûdü’l-hâl: Ahmed Ağa b. Hasan, Halil Çelebi b. Süleyman, Salim Çelebi b. Abdullah, Hasan Çelebi b. Abdullah.