Kısmet-i Askeriye Mahkemesi 19 Numaralı Sicil (H. 1109-1110 / M. 1698-1699) cilt: 58, sayfa: 504 Hüküm no: 376 Orijinal metin no: [92b-4] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Müteveffa Arabacılar kethüdası Ahmed Ağa’nın oğluna nafaka takdir edildiği Mahmiye-i İstanbul’da Mimârayas mahallesinde sâkin iken bundan akdem vefât eden Arabacılar kethüdâsı Ahmed Ağa b. Ali’nin sulbî oğlu Mustafa nâm sagīrin tesviye-i umûruna vasiyy-i muhtârı olup mahmiye-i mezbûrede Mollagürânî mahallesinde sâkin bâ‘isü’l-kitâb Mustafa Çelebi b. Mehmed mahfil-i kazâda takrîr-i kelâm edip vasîsi olduğum sagīr-i mezbûrun nafaka ve kisveye eşedd-i ihtiyâcı olmağla babası müteveffâ-yı mezbûrdan müntakil hisse-i irsiyesinden kadr-ı ma‘rûf nafaka ve kisve-bahâ farz ve takdîr olunmak matlûbumdur dedikde vasiyy-i mezbûrun kelimât-ı meşrûhası vâkı‘a mutâbık olmağın hâkim-i muvakkı‘-i sadr-ı kitâb tûbâ-lehû ve hüsnü-meâb efendi hazretleri sagīr-i mezbûr Mustafa’nın mal-ı müntakilinden para üçer akçe hesâbı üzere yevmî sekizer akçe nafaka ve kisve-bahâ farz ve takdîr buyurup meblağ-ı mefrûz-ı mezbûr yevmî sekizer akçeyi sagīr-i mezbûrun levâzım-ı zarûriyesine harc ü sarfa ve inde’z-zarûre istidâneye ve lede’z-zafer malına rücû‘a vasiyy-i mezbûra izin birle mâ-vaka‘a kayd-şüd. Fî gurreti Rebî‘ülevvel li-seneti 1110 Şuhûdü’l-hâl: Ahmed Ağa b. Hasan, Halil Çelebi b. Süleyman, Salim Çelebi b. Abdullah, Hasan Beşe b. Abdullah, Nasuh Beşe b. Yusuf.