Kısmet-i Askeriye Mahkemesi 19 Numaralı Sicil (H. 1109-1110 / M. 1698-1699) cilt: 58, sayfa: 505 Hüküm no: 377 Orijinal metin no: [92b-5] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Hatice Hatun’un vefat eden eşi Ramazan Beşe’de mehir alacağı olduğunu ispat ettiği Mahmiye-i İstanbul’da Hoca Kasım Gönânî mahallesinde sâkin iken bundan akdem düyûnu terekesinden ezyed olduğu hâlde vefât eden Ramazan Beşe b. Hüseyin b. Abdullah’ın zevce-i menkûha-i metrûkesi olup zâtı ta‘rîf-i şer‘î ile mu‘arrefe hâfızatü’l-kitâb Hadîce Hatun bt. İbrahim mahfil-i kazâda müteveffâ-yı mezbûrun tesviye-i umûruna kıbel-i şer‘den vasî ve kayyım nasb olunan Mehmed Çelebi b. Ali mahzarında üzerine da‘vâ ve takrîr-i kelâm edip zevcim müteveffâ-yı mezbûr Ramazan Beşe b. Hüseyin b. Abdullah târîh-i fevtinden yedi sene mukaddem beni huzûr-ı Müslimînde üç bin sağ akçe mehr-i müeccel tesmiyesiyle tezevvüc ve kabûl edip akd-i nikâh beynimizde kāim iken meblağ-ı mezbûru kable’l-edâ fevt olmağla tereke-i kāsırasından taleb ederim suâl olunsun dedikde gıbbe’s-suâl ve’l-inkâr müdde‘iye-i mezbûreden sıdk-ı makāline beyyine taleb olundukda udûl-ı Müslimînden Kürkçübaşı mahallesinde sâkin Hüseyin Çelebi b. Mustafa ve Kefeli mahallesinde sâkin Mehmed Çelebi b. Mustafa li-ecli’ş-şehâde mahfil-i kazâya hâzırân olup isre’l-istişhâd fi’l-hakīka müteveffâ-yı mezbûr Ramazan Beşe b. Hüseyin b. Abdullah târîh-i fevtinden yedi sene mukaddem işbu müdde‘iye-i mezbûre Hadîce Hatun’u bizim huzûrumuzda üç bin sağ akçe mehr-i müeccel tesmiyesiyle tezevvüc ve kabûl edip akd-i nikâh beynlerinde kāim iken vefât eyledi biz bu husûsa bu vech üzere şâhidleriz şehâdet dahi ederiz deyü her biri edâ-i şehâdet-i şer‘iyye ettikde ba‘de’t-ta‘dîl ve’t-tezkiye şehâdetleri makbûle olmağın gıbbe’t-tahlîfi’ş-şer‘î mûcebiyle ba‘de’l-hükm mâ-vaka‘a kayd-şüd. Fî 18 min-Şa‘bân li-seneti 1110 Şuhûdü’l-hâl: İsmail Çelebi b. Abdulkadir, Mustafa Çelebi b. Ramazan, Abdurrahman Çelebi b. Ali, Mehmed Efendi b. Mehmed, Mehmed Efendi b. el-Hâc Sunullah.