Kısmet-i Askeriye Mahkemesi 19 Numaralı Sicil (H. 1109-1110 / M. 1698-1699) cilt: 58, sayfa: 508 Hüküm no: 381 Orijinal metin no: [93a-4] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Müteveffa Fatıma Hatun’un varislerinin miras davasında zimmetlerini ibra ettikleri Husûs-ı âti’l-beyânın mahallinde istimâ‘ ve tahrîri içün bi’l-iltimâs savb-ı şer‘den me’zûnen irsâl olunan Velizâde Mehmed Efendi mahmiye-i İstanbul’da Unkapanı kurbünde Elvanzâde mahallesinde sâkine iken bundan akdem vefât eden Fâtıma Hatun bt. Şa‘bân’ın menziline varıp zeyl-i vesîkada muharrerü’l-esâmî Müslimîn huzûrlarında akd-i meclis-i şer‘-i şerîf eyledikde müteveffât-ı mezbûrenin verâseti zevc-i metrûku Yusuf Çelebi b. Abdullah ile sagīre kızı Fâtıma’ya ve vâlidesi Havva Hatun’a ve li-ebeveyn er karındaşı Süleyman nâm sagīreye münhasıra olup tashîh meselesi on iki sehmden olmağla sihâm-ı mezbûrenin üç sehmi mezbûr Yusuf Çelebi’ye ve altı sehmi sagīre-i mezbûreye ve iki sehm mezbûre Havva’ya ve bâkī bir sehm mezbûr Süleyman’a isâbet ettikde mezbûr Yusuf Çelebi asâleten ve kızı sagīre-i mezbûrenin tesviye-i umûruna kıbel-i şer‘den mansûb vasîsi ve velîsi olmağla vesâyeten meclis-i ma‘kūd-ı mezbûrda zâtı ta‘rîf-i şer‘î ile mu‘arrefe olan bâ‘isetü’l-kitâb mezbûre Havva Hatun mahzarında üzerine da‘vâ ve takrîr-i kelâm edip zevcem müteveffât-ı mezbûre Fâtıma Hatun bt. Şa‘bân b. Halil’in terekesinden olup <> mezbûre Havva’nın yedinde olan işbu otuz guruş kıymetli bir incili altın ön kuşak ve dörder ayaklı zümrüd ve otuz guruş kıymetli bir çift altın küpeyi mezbûre Havva Hatun mîrâsa idhâlden <> imtinâ‘ eder suâl olunsun dedikde gıbbe’s-suâl mezbûre Havva Hatun cevâbında işbu yedimde olan kuşak ve küpe benim mülk ve hakkım olup müteveffât-ı mezbûrenin aslâ alâkası yokdur [deyü] def‘le mukābele edicek gıbbe’l-istintâk ve’l-inkâr müdde‘î-i mezbûrdan zikr olunan küpe ve kuşak müteveffât-ı mezbûrenin mülkü olduğuna beyyine taleb olundukda ityân-ı [beyyineden] ızhâr-ı acz edip istihlâf etmeğin zikr olunan kuşak ve küpe mezbûre Havva Hatun’un kendi mülkü ve hakkı olup müteveffât-ı mezbûrenin terekesinden olmadığına mezbûre Havva Hatun’a yemîn teklîf olundukda ol dahi ber-vefki’l-mesûl yemîn billâhi’l-aliyyi’l-a‘lâ etmeğin mûcebince mezbûr Yusuf Çelebi husûs-ı mezbûra müte‘allık mezbûre Havva Hatun’a bilâ-beyyine muhâsamadan men‘ olundukdan sonra mezbûr Yusuf Çelebi meclis-i mezbûrda tereke-i müteveffât-ı mezbûra bi’l-verâse vaz‘-ı yed eden mezbûre Havva mahzarında asâleten ve vesâyeten ikrâr edip zevcem müteveffât-ı mezbûrenin terekesi tahrîr ve ba‘de ihrâci’l-mesârif ber-mûceb-i defter-i kassâm-ı askerî tashîh-i mezbûr üzere bana isâbet eden dokuz bin altı yüz on beş sağ akçeyi ve vasîsi olduğum sagīre-i mezbûrenin hissesine isâbet eden on dokuz bin iki yüz otuz akçeyi asâleten ve vesâyeten terekeden olmak üzere mezbûre Havva yedinden tamâmen ahz u kabz eyledim min-ba‘d meblağayn-ı mezbûreynden yedinde bir akçe bâkī kalmayıp dâhil-i defter ve hâric-i defter kalîl ü kesîr terekeden hisseme isâbet eden cemî‘ mîrâs da‘vâsından mezbûrenin zimmetini ibrâ eyledim gıbbe’t-tasdîk mezbûre Havva Hatun meclis-i mezbûrda merkūm Yusuf mahzarında ikrâr edip kızım müteveffât-ı mezbûrenin terekesinden benim hisseme isâbet eden altı bin dört yüz on sağ akçeyi asâleten ve sagīr-i mezbûr Süleyman’ın vasiye-i şer‘iyyesi olmağla mezbûr Süleyman’a isâbet eden üç bin iki yüz beş akçeyi mezbûr Yusuf yedinden tamâmen ahz u kabz eyledim min-ba‘d terekeden hisseme isâbet eden mîrâs da‘vâsından mezbûr Yusuf ile sagīr-i mezbûrun zimmetlerini asâleten ibrâ eyledim dedikde gıbbe’t-tasdîk vâki‘ hâli mevlânâ-yı mezbûr mahallinde ketb ü tahrîr ba‘dehû ma‘an irsâl olunan Hasan b. Abdullah meclis-i şer‘a gelip vukū‘u üzere inhâ ve takrîr etmeğin mâ-vaka‘a bi’t-taleb ketb-şüd. Hurrire fî 4 min-Rebî‘i’l-âhir li-seneti aşer ve mi’ete ve elf. Şuhûdü’l-hâl: Salih Efendi el-İmâm, el-Hâc Bekir b. Ömer, Ömer b. Mustafa. Beyâz, beyâz, beyâz.