Kısmet-i Askeriye Mahkemesi 19 Numaralı Sicil (H. 1109-1110 / M. 1698-1699) cilt: 58, sayfa: 509 Hüküm no: 382 Orijinal metin no: [93b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Müteveffa Ahmed Odabaşı’nın varislerinin ev hisselerini Emetullah Hanım’a sattıkları Mahmiye-i İstanbul’da Sarıgez mahallesinde sâkin iken vefât eden Ahmed Odabaşı b. Mehmed’in verâseti zevcesi Emetullah Hatun bt. Mehmed ile li-ümmin kız karındaşı Havva’ya ve li-ebin kız karındaşı Emine’ye münhasıra ve tashîh meselesi bi-hükmi’r-red on altı sehmden olup sihâm-ı mezbûrun dört sehmi zevcesine ve üç sehmi mezbûre Havva’ya ve dokuz sehmi mezbûre Emine’ye isâbet edip menzil-i âti’z-zikr semeni olan sekiz bin beş yüz akçenin iki bin yüz yirmi dört akçesi dört sehmi mukābelesinde zevce-i mezbûreye ve bin beş yüz doksan üç akçesi üç sehmi mukābelesinde mezbûre Havva’ya ve dört bin yedi yüz yetmiş dokuz akçesi dokuz sehmi mukābelesinde mezbûre Emine’ye isâbeti tahakkukundan sonra zâtları mahalle-i mezbûre ahâlîsinden Şa‘bân Çelebi b. Mehmed ve el-Hâc Ahmed b. Abdullah ta‘rîfleriyle mu‘arrefe olan mezbûretân Havva bt. ( ) mahfil-i kazâda bâ‘isetü’l-kitâb mezbûre Emetullah mahzarında her biri ikrâr ve takrîr-i kelâm edip müteveffâ-yı mezbûrun ile’l-vefât yedinde mülk ve hakkı olup medîne-i Üsküdar müzâfâtından Adalar nâhiyesine tâbi‘ Maldepe-i Sagīr’de vâki‘ bir tarafdan Dimitri nâm zimmî menzili ve bir tarafdan Savatyanos nâm zimmî menzili ve bir tarafdan Palaş menzili ve bir tarafdan tarîk-i âm ile mahdûd fevkānî bir bâb oda ve sundurma ve ahırı müştemil mülk menzilden tashîh-i mezbûr üzere hissemize isâbet eden on iki sehm-i şâyi‘imizi bi-cümleti’t-tevâbi‘ ve’l-levâhık ve kâffeti’l-hukūk ve’l-merâfık tarafeynden îcâb ve kabûlü hâvî şurût-ı müfsideden ârî bey‘-i bâtt-ı sahîh-i şer‘î ile mezbûre Emetullah’a altı bin üç yüz yetmiş iki sağ akçeye bey‘ u temlîk ol dahi iştirâ ve temellük edip semeni olan meblağ-ı mezbûru yedinden tamâmen alıp kabz edip mahallinde kabza mezbûreyi taslît eyledik ba‘de’l-yevm menzil-i mezbûr irsen ve şirâen mülk-i mahzı ve hakk-ı sırfıdır dediklerinde gıbbe’t-tasdîk mâ-vaka‘a ketb-şüd. Fî 20 Rebî‘ülevvel li-seneti 1110 Şuhûdü’l-hâl: Pîrîzâde Mehmed Efendi el-Hâc Ahmed b. Abdullah, Şa‘bân Beşe b. Mehmed, Ahmed Çelebi b. Hüseyin.