Kısmet-i Askeriye Mahkemesi 19 Numaralı Sicil (H. 1109-1110 / M. 1698-1699) cilt: 58, sayfa: 513 Hüküm no: 385 Orijinal metin no: [94a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Hüseyin’in vefat eden Molla Abdüsselam’daki kitap ve eşyalarını terekeden teslim aldığı Husûs-ı âti’l-beyânın mahallinde ketb ü tahrîri iltimâs olunmağın savb-ı şer‘den me’zûnen Mevlânâ Abdurrahman Efendi b. Mustafa mahmiye-i İstanbul’da Ayasofya-i kebîr <> kilerinde hâlâ Kayyumbaşı el-Hâc Hüseyin b. Bali’nin sâkin olduğu mevzi‘a varıp zeyl-i vesîkada muharrerü’l-esâmî Müslimîn huzûrlarında akd-i meclis-i şer‘-i nebevî eyledikde bostânî mütekā‘idlerinden olup mahmiye-i mezbûrede Bahçekapısı kurbünde Vanî Efendi Dârü’l-hadîsi’nde sâkin olup bundan akdem Vilâyet-i Rumeli’nde Ülgün kasabasında müsâfiren vefât eden Molla Abdüsselam b. Ahmed b. Abdullah’ın zâhirde vâris-i ma‘rûfu olmayıp cemî‘ terekesi cânib-i beytülmâle âid olup Hadîka-i hâssa-i şehriyârîde bi’l-fi‘il bostancı ve tâife-i mezbûrenin beytülmâllerini kabza taraf-ı Saltanat-ı aliyye’den bâ-hatt-ı hümâyûn-ı sa‘âdet-makrûn memûr olan umdetü’l-havâs ve’l-mukarrebîn izzetlü Mustafa Ağa b. Hüseyin b. Mehmed’in kuşçubaşısı ve tarafından müseccel vekîli Osman Bey b. Süleyman meclis-i ma‘kūd-ı mezbûrda işbu hâfızü’l-kitâb müteveffânın mûdi‘i merkūm Hüseyin Efendi b. Bali mahzarında bi’l-vekâle ikrâr ve takrîr-i kelâm edip müteveffâ-yı mezbûr Abdüsselam b. Ahmed hayâtında merkūm Hüseyin Efendi’yle işbu iki müfredât defteri nâtık olduğu üzere …? vaz‘ eylediği işbu meclisde mu‘âyene ve müşâhede olunan bir Dürer ve Gurer ve bir Gülistan bir Sûden-i(?) Gülistan ve dört aded lügat ve bir lügat-i …? ve …? ve bir Mahmudiye ve bir İftitâh ve bir Menâsik-i hac ve bir Bostan ma‘a Şem‘î ve bir Şerh-i Merâh ve …? ve bir Şerh-i Dîbâce ve bir Pendnâme ma‘a şerh ve bir Muhyiddin ve bir Molla Câmî ve Çârperdî ve bir Risâle-i Birgili ve bir Kutbeddîn ve Şâfiye ve bir Kâfiye mecmû‘ası ve bir Siyer-i(?) Ebulfeth ve bir Ta‘lîmü’l-müte‘allim ma‘a şerh ve bir Dekāyıku’l-hakāyık ve bir Şerh-i Kutbüddin ve bir Dîvân-ı Hâfız ve bir Şerh-i İzzî ve bir mecmû‘a-i sarf ve bir Dinkūz ve bir Şerh-i Dîbâce ve iki Molla Fenârî ve bir Ferâizî ve bir Mutavassıt ve bir Lügat-i Halîmî ve bir Mu‘rib-i Avâmil ve bir Şerh-i Ebyât ve …? ve nahve müte‘allık bir kitâb ve evrâk-ı perîşân nâm kitâblar a‘yânı mevcûde olmağla zikr olunan kütübü ve işbu bir yemenî yorgan ve bir çuka başlık ve bir çârşeb ve iki beyâz ihrâm ve bir köhne sarık ve iki zıbın ve bir sepet ve bir musaddef devât ve bir acem bardak ve bir bakır tasın dahi a‘yânı mevcûde olmağla eşyâ-i muharrere-i mezkûreyi dahi tereke-i müteveffâ-yı mezbûrdan olmak üzere merkūm Hüseyin Efendi b. Bali yedinden tamâmen alıp bi’l-vekâle kabz eyledim ba‘de’l-yevm bâlâda ale’l-esâmî müteveffâ-yı mezbûrun kendi müfredât defteri mûcebince tahrîr olunan kütübden ve eşyâdan yedinde ve zimmetinde bir şey kalmadı dedikde gıbbe’-t-tasdîkı’ş-şer‘î vâki‘ hâli mevlânâ-yı mezbûr mahallinde tahrîr ba‘dehû ma‘an mürsel Hasan Çelebi b. Abdullah ve Mehmed b. Ahmed ile meclis-i şer‘a gelip vukū‘u üzere inhâ ve takrîr etmeğin mâ-vaka‘a kayd-şüd. Fî 12 min-Rebî‘i’l-âhir li-seneti aşer ve mi’ete ve elf. Şuhûdü’l-hâl: İbrahim Efendi b. Hüseyin, Ali Efendi b. Mustafa, Murad Efendi b. Davud, Ali Efendi b. Mustafa, Hazînedâr Ali Efendi, Molla Mustafa b. Hüseyin ve gayruhum.