Kısmet-i Askeriye Mahkemesi 19 Numaralı Sicil (H. 1109-1110 / M. 1698-1699) cilt: 58, sayfa: 523 Hüküm no: 394 Orijinal metin no: [95b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Hüseyin’in vasisi olduğu kız çocuğu Ayşe’ye olan borcunu kabul ettiği Mahmiye-i İstanbul’da Mimârsinan mahallesinde sâkin [iken] bundan akdem vefât eden Canbaz el-Hâc Receb b. Hüseyin b. Abdullah’ın sagīre kızı Âişe’nin min-kıbeli’l-ebb vasiyy-i muhtârı olan es-Seyyid Hüseyin b. Mehmed meclis-i şer‘de üzerine hasbî nâzır nasb olunan Abdullah Çelebi b. İsmail mahzarında ikrâr ve takrîr-i kelâm edip yedimde olan işbu muhâsebe defteri nâtık olduğu üzere sagīre-i mezbûre Âişe’nin babası müteveffâ-yı mezbûrun tereke-i mebî‘ası bahâsından ve târîh-i kitâba gelince zimem-i nâsdan tahsîl olunan meblağlardan yedimde sagīre-i mezbûrenin ba‘de küllî hesâb seksen beş bin yüz yetmiş beş sağ [akçe] malı müctemi‘ olup lâkin ben meblağ-ı mezbûru kendi malıma halt ve istihlâk etmekle zimmetimde deynim olmağın el-hâletü hâzihi nâzır-ı merkūm meblağ-ı mezkûru onu on bir hesâbı üzere târîh-i merkūmdan bir sene tamâmında sekiz bin beş yüz on yedi sağ akçe ve ribh sehâmından olmak üzere devr-i şer‘î ile üzerime devr ve ilzâm-ı ribh ettikde ben dahi iltizâm ve kabûl eyledim ba‘de’l-yevm asıl mal ve ribh-i mülzem cem‘an doksan üç bin altı yüz doksan iki sağ akçe sagīre-i mezbûreye vâcibü’l-edâ zimmetimde müeccel deynimdir dedikde gıbbe’t-tasdîkı’l-vicâhî mâ-vaka‘a bi’t-taleb ketb-şüd. Hurrire 9 min-Rebî‘ülâhir sene 1110 Şuhûdü’l-hâl: Osman Çavuş b. Mehmed, diğer Osman Çavuş b. Mustafa, el-Hâc Ali b. İbrahim, Mehmed Efendi b. Emrullah, Ali Bey b. Mustafa, Hüseyin Çelebi b. Ali, İsmail b. el-Hâc Receb, Hüseyin Çelebi b. Mehmed ve gayruhum.