Kısmet-i Askeriye Mahkemesi 19 Numaralı Sicil (H. 1109-1110 / M. 1698-1699) cilt: 58, sayfa: 525 Hüküm no: 396 Orijinal metin no: [96a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Kara Mustafa Çavuş’un varislerinin miras kalan evi Mustafa’ya sattıkları Mahmiye-i İstanbul’da Aksaray kurbünde Bâkī Paşa odalarında sâkin olup bundan akdem sefer-i hümâyûnda vefât eden Kara Mustafa Çavuş [b.] Yusuf’un verâseti zevce-i menkûha-i metrûkesi Havva Hatun bt. Sadık ve kebîr oğlu Ahmed’e ve kızları İsmihan’a ve Saliha’ya münhasıra ve tashîh meselesi otuz iki sehmden olmağla sihâm-ı mezbûrenin dört sehmi mezbûre Havva Hatun’a ve bâkī yirmi sekiz sehmin on dört sehmi mezbûr Ahmed’e ve yedişer sehmi mezbûretân İsmihan ve Saliha’dan her birine isâbeti tahakkukundan sonra mezbûr Ahmed ile zâtı Veli b. Halil ve İbrahim b. Mehmed ta‘rîfleriyle mu‘arrefe olan mezbûre Havva Hatun meclis-i şer‘de hâfızü’l-kitâb el-Hâc Mustafa b. Mehmed mahzarında her biri ikrâr ve takrîr-i kelâm edip mûrisimiz müteveffâ-yı mezbûrun ile’l-vefât yedinde mülk ve hakkı idiği müsbet olup medîne-i Manisa’da Ciraslar-ı kebîr mahallesinde vâki‘ bir tarafdan mezbûr el-Hâc Mustafa mülküne ve bir tarafdan Mustafa Ağa b. Halil Ağa mülküne ve bir tarafdan Anton zimmî mülküne ve bir tarafdan tarîk-i âm ile mahdûd kiremit örtülü fevkānî tavanlı ve Arabî pencereli bir oda ve bir sagīr oda ve tahtında bir ahır ve kenîf ve zât-ı eşcâr-ı müsmire bahçeden tashîh-i mezbûr üzere bize isâbet [eden] on sekiz sehm-i şâyi‘amızı bi-cümleti’t-tevâbi‘ ve’l-levâhık tarafeynden îcâb ve kabûlü hâvî bey‘-i bâtt-ı sahîh-i şer‘î ile yüz üç buçuk guruşa mezbûr el-Hâc Mustafa’ya bey‘ u teslîm ve temlîk ol dahi iştirâ ve temellük ve kabûl eyledikden sonra semeni olan meblağ-ı mezbûr yüz üç buçuk guruşu mezbûr el-Hâc Mustafa yedinden bi-kadri’l-hısâs tamâmen alıp kabz edip meblağ-ı mezbûru mahallinde kabza mezbûr el-Hâc Mustafa’yı taslît eyledik ba‘de’l-yevm sâlifü’l-beyân on sekiz sehm-i şâyi‘-i mezbûr el-Hâc Mustafa’nın mülk-i müşterâsıdır keyfe mâ yeşâ ve yehtâr mutasarrıf olsun dedikde gıbbe’t-tasdîkı’ş-şer‘î mâ-vaka‘a bi’t-taleb ketb olundu. Hurrire fî 19 min-Rebî‘i’l-âhir li-seneti aşer ve mi’ete ve elf. Şuhûdü’l-hâl: Molla Ali b. Ahmed, Abdurrahman Çelebi b. Ömer, el-Hâc Mustafa b. Hüseyin, el-Hâc Mustafa b. Ahmed, Veli Çelebi b. Halil, Mehmed Bey b. Halil.