Kısmet-i Askeriye Mahkemesi 19 Numaralı Sicil (H. 1109-1110 / M. 1698-1699) cilt: 58, sayfa: 526 Hüküm no: 397 Orijinal metin no: [96a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Kara Mustafa Çavuş’un varislerinin ev hisselerini zapteden Hasan’ın hisseleri sahiplerine iade etmesi Kezâlik isâbeti tahakkukundan sonra zâtı ta‘rîf-i şer‘î ile mu‘arrefe olan mezbûre Havva ile mezbûr Ahmed mahfil-i kazâda fi’l-asl Vilâyet-i Anadolu’da Manisa mahallâtından Ciraslar-ı kebîr mahallesinden olup mahmiye-i mezbûrede Bodrum Han’ında müsâfiren sâkin Hasan b. Abdulkadir mahzarında üzerine da‘vâ ve takrîr-i kelâm edip müteveffâ-yı mezbûrun ile’l-vefât <> yedinde mülk ve hakkı idiği müsbet olup Ciraslar-ı kebîr mahallesinde vâki‘ bir tarafdan Halil Ağazâde Mustafa Ağa mülkü ve bir tarafdan el-Hâc Mustafa b. Mehmed mülküne ve bir tarafdan Anton zimmî mülküne ve bir tarafdan tarîk-i âm ile mahdûd büyût-ı adîyeyi müştemil menzil ve bahçeden tashîh-i mezbûr üzere bize isâbet eden on sekiz sehme mezbûr Hasan Çelebi bi-gayr-ı hakkın vaz‘-ı yed eder suâl olunsun dedikde gıbbe’s-suâl mezbûr Hasan Çelebi cevâbında menzil-i mahdûd-ı mezbûru sagīretân-ı mezbûretân Saliha ve İsmihan’ın vâlideleri ve vasiye-i mansûbeleri olup hâlâ zevcem olan işbu hâzıra bi’l-meclis İsmihan bt. Abdullah’dan yüz yirmi beş guruşa iştirâ ve def‘-i semen eyledim deyicek menzil-i mahdûd-ı mezbûrda tashîhi mezbûr üzere on sekiz sehmden [kasr-ı yedine] mezbûr Hasan’a tenbîh birle mâ-vaka‘a bi’t-taleb ketb olundu. Fî 18 min-şehri mezbûr li-seneti’l-merkūme. Şuhûdü’l-hâl: Eş-şâhidûnü’s-sâbikūn.