Kısmet-i Askeriye Mahkemesi 19 Numaralı Sicil (H. 1109-1110 / M. 1698-1699) cilt: 58, sayfa: 527 Hüküm no: 398 Orijinal metin no: [96a-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Havva Hatun’un vefat eden eşi Pehlivanzade Mustafa’ya verdiği borca karşılık başkasına rehin bıraktığı eşyalarının kendisine teslimi Mahmiye-i İstanbul’da Altıbohça mahallesinde sâkin iken bundan akdem vefât eden Pehlivanzâde el-Hâc Mustafa b. el-Hâc Osman’ın zevce-i menkûha-i metrûkesi olup zâtı İbrahim Çelebi b. Mehmed ve Ahmed Çelebi b. Süleyman ta‘rîfleriyle mu‘arrefe olan hâfızatü’l-kitâb Havva Hatun bt. Osman mahfil-i kazâda müteveffâ-yı mezbûrun tesviye-i umûruna vasiyy-i mansûbu olmağla terekesine vaz‘-ı yed eden el-Hâc Mehmed b. İbrahim mahzarında üzerine da‘vâ ve takrîr-i kelâm edip zevcim müteveffâ-yı mezbûr el-Hâc Mustafa b. el-Hâc Osman hayâtında eşyâ-i memlûkemden mecmû‘u üç yüz guruş kıymetli beş köşe bir incili serpûş ve bir inci yaka ve bir enselik ve bir çift mücevher bilezik ve bir mücevher kuşak ve birer ayaklı bir çift zümrüd küpemi benim iznim ile dâyini gāib ani’l-meclis Mehmed Efendi b. Mustafa Efendi’ye iki yüz kırk beş guruş deyni mukābelesinde rehin vaz‘ edip hattâ hâl-i kemâl-i sıhhatinde eşyâ-i muharrere-i mezbûreyi ber-vech-i muharrer rehin vaz‘ eylediğini alâ-ruûsi’l-işhâd ikrâr ve işhâd dahi edip kable’l-edâ ve’l-fek fevt olmağla deyn-i mezbûru terekesinden edâ ve eşyâ-i muharrere-i mezbûremi ba‘de’l-fek bana teslîme vasiyy-i mezbûra tenbîh olunmak matlûbumdur dedikde gıbbe’s-suâl ve’l-inkâr müdde‘iye-i mezbûreden müdde‘âsına beyyine taleb olundukda udûl-ı Müslimînden mahmiye-i mezbûrede Gül Câmi‘i mahallesinde sâkin el-Hâc Memiş b. Mustafa ve Şa‘bân Dede b. Abdullah li-ecli’ş-şehâde meclis-i şer‘a hâzırân olup isre’l-istişhâd fi’l-hakīka müteveffâ-yı mezbûr Pehlivanzâde el-Hâc Mustafa b. el-Hâc Osman hâl-i kemâl-i sıhhatinde zevcesi işbu müdde‘iye-i mezbûre Havva Hatun’un eşyâ-i memlûkesinden mecmû‘u üç yüz guruş kıymetli beş köşe bir incili serpûş ve bir incili yaka ve bir enselik ve bir çift mücevher bilezik ve bir mücevher kuşak ve birer ayaklı zümrüd küpesini izniyle dâyinim gāib ani’l-meclis Mehmed Efendi b. Mustafa Efendi’ye iki yüz kırk beş guruş deynim mukābelesinde rehin vaz‘ eyledim deyü huzûrumuzda ikrâr ve bizi işhâd eyledi biz bu husûsa bu vech üzere şâhidleriz şehâdet dahi ederiz deyü her biri edâ-i şehâdet-i şer‘iyye ettikde ba‘de’t-ta‘dîl ve’t-tezkiye şehâdetleri makbûle olmağın mûcebiyle ba‘de’l-hükm mâ-vaka‘a kayd-şüd. Fî 17 Rebî‘ülevvel sene 1110 Şuhûdü’l-hâl: Hüseyin Ağa b. İbrahim, el-Hâc Süleyman b. Mehmed, Nasuh Beşe b. Ali, İbrahim Çelebi b. Mehmed, Hüseyin b. Mehmed.