Kısmet-i Askeriye Mahkemesi 19 Numaralı Sicil (H. 1109-1110 / M. 1698-1699) cilt: 58, sayfa: 532 Hüküm no: 401 Orijinal metin no: [97a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Macar asıllı köle Dilaver’in hür olduğunu ispat ettiği Husûs-ı âti’l-beyânın mahallinde istimâ‘ ve tahrîri iltimâs olunmağın cânib-i şer‘den Mevlânâ Mehmed Efendi b. Mahmud irsâl olunup ol dahi mahmiye-i İstanbul’da Bezzâzistân-ı atîk kurbünde Hüseyin Ağa Câmi‘-i şerîfi’nde beytülmâli’l-hâssa emîni sâkin olduğu odaya varıp zeyl-i vesîkada muharrerü’l-esâmî Müslimîn huzûrlarında akd-i meclis-i şer‘-i nebevî ettikde müteveffâ-yı âti’z-zikre rıkk-ı sâbıkını mu‘terif olan işbu orta boylu açık kaşlı sarı elâ gözlü Macariyyü’l-asl hâfızü’l-kitâb Dilaver b. Abdullah mahmiye-i mezbûrede Unkapanı kurbünde Elvanzâde mahallesi ahâlîsinden olup mahrûse-i Edirne kurbünde Kozluca nâm karyede müsâferet vechi üzere sâkin iken bundan akdem vefât eden Ali Bey b. Abdullah b. Abdullah’ın zevce-i menkûha-i metrûkesi olup zâtı ta‘rîf-i şer‘î ile mu‘arrefe olan Ümmühani bt. Abdullah muvâcehesinde üzerine da‘vâ ve takrîr-i kelâm edip seyyidim müteveffâ-yı mezbûr Ali Bey b. Abdullah b. Abdullah fevtinden bir sene mukaddem mahrûse-i mezbûreye gider oldukda yedi sene bana ale’l-vechi’l-istikāmet hizmet etmek üzere mükâtebim ol eğer vefât edersem malımdan âzâd ol deyü huzûr-ı Müslimînde ikrâr ve işhâd edip fevt oldukda terekesinin sülüsü fetâ kıymetimin nısfı olan kırk beş guruşa vâfî olmağla ben hür olmuş iken mezbûre Ümmühani rık olup terekeden olmak üzere bana vaz‘-ı yed eder suâl olunsun dedikde gıbbe’s-suâl mezbûre Ümmühani cevâbında zevci müteveffâ-yı mezbûrun mahrûse-i mezbûrede yüz guruş kıymetli iki re’s câriyesi olduğunu ikrâr ve müdde‘î-i mezbûrun ber-vech-i muharrer müdde‘âsını inkâr edicek müdde‘î-i mezbûrdan bu vechile müdde‘âsına beyyine taleb olundukda udûl-ı ahrâr-ı ricâl-i Müslimînden mahalle-i mezbûrede sâkin İbrahim Beşe b. Abdülbaki ve Çukur mahallede sâkin Ömer Çelebi b. Ebubekir li-ecli’ş-şehâde meclis-i ma‘kūd-ı mezbûra hâzırân olup isre’l-istişhâd fi’l-hakīka müteveffâ-yı mezbûr Ali Bey b. Abdullah b. Abdullah fevtinden bir sene mukaddem mahrûse-i mezbûreye gider oldukda abd-ı memlûkü işbu mevsûf-ı mezbûr Dilaver b. Abdullah içün yedi sene alâ-vechi’l-istikāmet bana hizmet <> etmek üzere mükâtebim olsun eğer vefât edersem malımdan âzâd olsun deyü huzûru<>muzda ikrâr ve bizi işhâd <> edip fevt oldukda terekesinin sülüsü mevsûf-ı mezbûrun fetâ kıymetinin nısfı olan kırk beş guruşa vâfî olmağla mevsûf-ı merkūm hür olmuşdur biz bu husûsa bu vech üzere şâhidleriz şehâdet dahi ederiz deyü her biri edâ-i şehâdet-i şer‘iyye ettikde ba‘de’t-ta‘dîl ve’t-tezkiye şehâdetleri makbûle olmağın mûcebiyle ba‘de’l-hükm vâki‘ hâli mevlânâ-yı mezbûr mahallinde tahrîr ba‘dehû ma‘an ba‘s olunan Mehmed b. Ahmed ve Mustafa b. Mehmed ile meclis-i şer‘a gelip alâ-vukū‘ihi inhâ ve takrîr etmeğin mâ-vaka‘a bi’t-taleb ketb olundu. Fi’l-yevmi’s-sâlis aşer min-şehri Rebî‘i’l-âhir li-seneti aşer ve mi’ete ve elf. Şuhûdü’l-hâl: Ömer Efendi b. Mehmed, Ahmed Ağa b. Mehmed, Mustafa Ağa b. Abdullah, Ali Çelebi b. el-Hâc Osman, Salih Efendi b. el-Hâc Mehmed, İsmail b. Ömer, Ahmed Çelebi b. Rıdvan, Ali Bey b. Muslu, Mehmed Çelebi b. Resul.