Kısmet-i Askeriye Mahkemesi 19 Numaralı Sicil (H. 1109-1110 / M. 1698-1699) cilt: 58, sayfa: 553 Hüküm no: 421 Orijinal metin no: [101b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Varissiz vefat eden Emine Hatun’un evinin Mustafa Ağa’ya satıldığı Husûs-ı âti’l-beyânın ketb ü tahrîr olunup [olunması’çün] savb-ı şer‘den me’zûnen Mevlânâ Mehmed Efendi b. Mahmud mahmiye-i İstanbul’da Kādıasker mahallesinde fahrü’l-akrân Mustafa Ağa b. Hüseyin’in menziline varıp zeyl-i kitâbda isimleri mastûr olan Müslimîn huzûrlarında akd-i meclis-i şer‘i şerîf olundukda mahalle-i mezbûrede sâkine iken bundan akdem vefât eden Emine Hatun bt. Abdullah b. Abdullah nâm mecnûnenin zâhirde vâris-i ma‘rûfu olmamağla mecmû‘-ı terekesi cânib-i beytülmâle âid oldukdan sonra mahalle-i mezbûrede bi’l-fi‘il beytülmâl-i hâs emîni mefharü’l-a‘yân Mustafa Ağa b. Abdülmennan tarafından husûs-ı âti’l-beyânda vekîl-i müsecceli ve kıbel-i şer‘den husûmet red ve cevâba me’zûn olan Mehmed Çelebi b. Mustafa meclis-i ma‘kūd-ı mezbûrda râfi‘ü’l-kitâb mezbûr Mustafa Ağa b. Hüseyin mahzarında ikrâr ve takrîr-i kelâm edip müteveffât-ı mezbûre Emine’nin ile’l-vefât yedinde mülk ve hakkı olup mahalle-i mezbûrede vâki‘ bir tarafdan müşteri-yi mezbûr Mustafa Ağa mülkü ve bir tarafdan Râbia Hanım bt. Salih Efendi mülkü ve bir tarafdan Ahmed Efendi? mülküne ve bir tarafdan tarîk-i âmma müntehî fevki iki bâb oda ve bir sofa ve tahtanî iki bâb oda ve bir sofa ve su kuyusu ve bir kenîf ve bir mikdâr havluyu müştemil mülk, menzil münâdîlerinden el-Hâc Mustafa b. Abdullah yediyle [sûk-ı] sultânîde mecma‘-ı nâs olan mevâzi‘de on beş gün mikdârı nidâ ve müzâyede olundu. Rağabât-ı nâs bi’l-külliye münkatı‘a oldukdan sonra mezbûr Mustafa Ağa üzerinde yüz elli guruşa karâr edip ziyâde ile tâlib-i âhar dahi zuhûr etmeyip ve meblağ-ı mezbûr el-yevm semen-i misli olduğu zeyl-i kitâbda muharrerü’l-esâmî Müslümanlar haberleri ile mütehakkık olup menzil-i mahdûd-ı mezbûru cemî‘ tevâbi‘ ve levâhıkı ve kâffe-i hukūk ve merâfıkı ile tarafeynden îcâb ve kabûlü hâvî şurût-ı müfsideden ârî bey‘-i kat‘î ile mezbûr Mustafa Ağa’ya yüz elli guruşa bey‘ ve teslîm ve temlîk ve kabûl edip semeni olan meblağ-ı mezbûr yüz elli guruşu vekâlet-i mahkiyem hasebiyle bi’t-tamâm ve’l-kemâl ahz u kabz eyledim ba‘de’l-yevm menzil-i mahdûd-ı mezbûr, mezbûr Mustafa Ağa’nın mülk-i müşterâsı olmuşdur keyfe mâ yeşâ ve yehtâr mutasarrıf olsun dedikde gıbbe’t-tasdîkı’ş-şer‘î vâki‘ hâli mevlânâ-yı mezbûr mahallinde tahrîr ba‘dehû ma‘an irsâl olunan Mehmed b. Hüseyin ile meclis-i şer‘a gelip vukū‘u üzere inhâ ve takrîr etmeğin mâ-vaka‘a kayd şüd. Fî 25 min-Rebî‘ülâhir sene 1110. Şuhûdü’l-hâl: Hasan Efendi b. Mustafa el-imâm, Abdullah Efendi el-müezzin, Ali Çelebi b. Hasan, Ahmed Efendi b. Abdullah, Hacı Mehmed b. Mehmed, Mustafa Çelebi b. Ahmed, el-Hâc Halil b. Hamza, Mustafa b. Osman