Kısmet-i Askeriye Mahkemesi 19 Numaralı Sicil (H. 1109-1110 / M. 1698-1699) cilt: 58, sayfa: 554 Hüküm no: 422 Orijinal metin no: [101b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Ümmühani Hatun’un tek varisi olan kardeşi Safiye’nin vasiden terekedeki hakkını aldığı Husûs-ı âti’z-zikrin mahallinde istimâ‘ ve tahrîri iltimâs olunup kıbel-i şer‘den me’zûnen irsâl olunan Mevlânâ el-Hâc Abdurrahman Efendi b. Mustafa mahmiye-i İstanbul’da Demirkapı kurbünde Dâye Hatun mahallesinde sâkine iken bundan akdem vefât eden Ümmühani Hatun bt. Mahmud’un menziline varıp zeyl-i kitâbda muharrerü’l-esâmî Müslimîn huzûrlarında akd-i meclis-i şer‘-i nebevî ettikde müteveffâ-yı mezbûrenin li-ebeveyn kız karındaşı ve vech-i âtî üzere hasren vârisesi olduğunu iddi‘â eden Kasım Paşa’da Kulaksız mahallesinde sâkine olup zâtı Kulaksız mahallesi ahâlîsinden Ahmed Efendi b. Mehmed ve Ahmed Beşe b. Mehmed ta‘rîfleriyle mu‘arrefe olan işbu bâ‘isetü’l-kitâb Safiye Hatun bt. Mahmud meclis-i ma‘kūd-ı mezbûrda müteveffâ-yı mezbûrenin bâ-hüccet-i şer‘iyye vasiyy-i muhtârı olmağla terekesine vaz‘-ı yed eden Ahmed Efendi b. Osman mahzarında üzerine da‘vâ ve takrîr-i kelâm edip ben müteveffât-ı mezbûre Ümmühani Hatun bt. Mahmud b. Mustafa ile li-ebeveyn karındaşlar olup vâlidemiz ismi Hanife Hatun bt. Ali ve babamız ismi mezbûr Mahmud ve dedemiz ismi Mustafa ve maskat-ı re’simiz vilâyet-i Anadolu’da Bartın kasabasıdır, zâhirde müteveffât-ı mezbûrenin mecmû‘-ı terekesine farzen ve redden benden gayrı vâris ve müstahıkk-ı âhar yoğiken vasiyy-i mezbûr tereke-i müteveffât-ı mezbûreyi bana teslîmden imtinâ‘ eder suâl olunsun dedikde gıbbe’s-suâl vasiyy-i mezbûr cevâbında terekesine vech-i muharrer üzere vaz‘-ı yedini ikrâr ve müdde‘iye-i mezbûrenin vech-i meşrûh üzere müdde‘âsını inkâr edicek müdde‘iye-i mezbûreden müdde‘âsına beyyine taleb olundukda udûl-ı ahrâr-ı ricâl-i Müslimînden zikr olunan Kulaksız mahallesinde sâkin mezbûr Ahmed Efendi b. Mehmed ve Ahmed Beşe b. Mahmud li-ecli’ş-şehâde meclis-i ma‘kūd-ı mezbûra hâzırân olup isre’l-istişhâd fi’l-hakīka işbu müdde‘iye-i mezbûre Safiye Hatun müteveffât-ı mezbûre Ümmühani Hatun ile li-ebeveyn kız karındaşlardır vâlideleri ismi Emine Hatun bt. Ali ve babaları ismi mezbûr Mahmud ve dedeleri ismi mezbûr Mustafa ve maskat-ı re’sleri zikr olunan Bartın kasabasıdır ve zâhirde müteveffât-ı mezbûrenin mecmû‘-ı terekesine farzen ve redden mezbûre Safiye Hatun’dan gayrı vâris ve âhar müstahık olduğu ma‘lûmumuz değildir biz bu husûsa bu vech üzere şâhidleriz ve şehâdet dahi ederiz deyü her biri edâ-i şehâdet-i şer‘iyye edip ba‘de’t-ta‘dîl ve’t-tezkiye şehâdetleri makbûle olmağın mûcebince ba‘de’l-hükm müdde‘iye-i mezbûre yine meclis-i ma‘kūd-ı mezbûrda vasiyy-i mezbûr mahzarında bi’l-verâse ikrâr ve takrîr-i kelâm edip karındaşım müteveffât-ı mezbûrenin terekesi tahrîr ve defter olunup ba‘de ihrâci’l-mesârif ve’s-sülüs ber-mûceb-i defter-i kassâm-ı askerî vasiyy-i mezbûr Ahmed Efendi yedinde bâkī kalan para üçer akçe hesâbı üzere dokuz bin kırk akçeyi terekeden olmak üzere vasiyy-i mezbûr yedinden bi’t-tamâm alıp kabz eyledim min-ba‘d meblağ-ı mezbûrdan vasiyy-i mezbûr yedinde bir akçe ve bir habbe bâkī kalmayıp terekeden husûs-ı mîrâsa müte‘allık âmme-i da‘vâdan mezbûr Ahmed Efendi’nin zimmetini bi’l-verâse ibrâ-i âm ile ibrâ ve ıskāt eyledim dedikde gıbbe’t-tasdîkı’ş-şer‘î vâki‘ hâli mevlânâ-yı mezbûr mahallinde ketb ve tahrîr ba‘dehû ma‘an ba‘s olunan Mehmed b. Hüseyin ve Mehmed b. Ahmed ile meclis-i şer‘a gelip alâ-vukū‘ihi inhâ ve takrîr etmeğin [102a] mâ-vaka‘a bi’t-taleb kayd şüd. Fi’l-yevmi’s-sânî ve’l-ışrîn min-şehri Rebî‘i’l-âhir li-sene aşer ve mi’e ve elf. Şuhûdü’l-hâl: Süleyman Çelebi b. Mehmed, Mehmed Efendi b. Muharrem, Süleyman Efendi b. Mustafa, Ali Ağa b. Murad