Kısmet-i Askeriye Mahkemesi 19 Numaralı Sicil (H. 1109-1110 / M. 1698-1699) cilt: 58, sayfa: 564 Hüküm no: 430 Orijinal metin no: [103b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Ali b. Nasuh’un Yani’ye borcu olduğu Uncu tâifesinden bâ‘isü’l-kitâb Yani v. İlya nâm zimmî meclis-i şerîfde mahmiye-i İstanbul’da Mimârsinan mahallesi ahâlîsinden iken bundan akdem vefât eden Abdurrahmanzâde Mehmed Efendi b. el-merhûm Mehmed Efendi’nin hizmetinde olan işbu hâzır bi’l-meclis Ali b. Nasuh mahzarında üzerine da‘vâ ve takrîr-i kelâm edip mezbûr Ali b. Nasuh malımdan yirmi guruş ikrâz ve teslîm ol dahi yedimden ikrâz ve tesellüm ve kabz ve mesârifine sarfla istihlâk ettikden sonra meblağ-ı mezbûrun altı guruşunu yedinden alıp kabz edip bâkī on [dört] guruş hakkım kalmışdır suâl olunsun dedikde gıbbe’s-suâl mezbûr Ali cevâbında kazıyye müdde‘î-i mezbûrun takrîr-i meşrûhu üzere olduğunu bi-tav‘ihî ikrâr ve i‘tirâf etmeğin alâ-mûceb-i ikrârihî meblağ-ı bâkī-yi mezbûr on dört guruşu müdde‘î-i mezbûra edâya mezbûr Ali b. Nasuh’a tenbîh birle mâ-hüve’l-vâki‘ bi’t-taleb kayd şüd. Fî 27 min-Rebî‘i’l-âhir li-sene aşer ve mi’e ve elf. Şuhûdü’l-hâl: es-Seyyid Mustafa Çelebi b. es-Seyyid Mehmed Kasab, Hüseyin Bey b. Osman, Abdullah Çelebi b. İbrahim, Ömer Beşe b. Ali, Mehmed Çelebi b. Mustafa, Hasan Çelebi b. Abdullah