Kısmet-i Askeriye Mahkemesi 19 Numaralı Sicil (H. 1109-1110 / M. 1698-1699) cilt: 58, sayfa: 563 Hüküm no: 429 Orijinal metin no: [103a-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Ayşe Hatun’un öldükten sonra vasiyetini yerine getirmek üzere Hasan Ağa’yı tayin ettiği Husûs-ı âti’l-beyânın mahallinde ketb ü tahrîri içün savb-ı şer‘-i enverden Ahmed b. Mehmed Efendi irsâl olunup mahmiye-i İstanbul’da Uzun Şücâ‘ mahallesinde Âişe Hatun bt. Ahmed b. Mehmed’in menziline varıp zeyl-i vesîkada muharrerü’l-esâmî Müslimîn huzûrlarında akd-i meclis-i şer‘-i hatîr ettikde zâtı mahalle-i mezbûre ahâlîsinden el-Hâc Mustafa b. Ahmed ve Mehmed Beşe b. Abdurrahman [103b] ta‘rîfleriyle mu‘arrefe olan mezbûre Âişe Hatun meclis-i ma‘kūd-ı mezbûrda hâfızü’l-kitâb el-Hâc Hasan Ağa b. Murad mahzarında ikrâr ve takrîr-i kelâm edip benim aslâ vârisim olmamağla bi-emrillâhi te‘âlâ fevt olduğumda cemî‘ terekemi mezbûr el-Hâc Hasan Ağa kabz edip vücûh-ı birre ve hayra sarf eylesin deyü mukaddemâ vasiyet etmişdim, hâlâ vasiyet-i mezbûreden rücû‘ edip bi-emrillâhi te‘âlâ fevt olduğumda vech-i mesnûn üzere levâzım-ı techîz ve tekfînim görülüp düyûnum kazâ olundukda bâkī kalan terekemin sülüsünü el-Hâc Hasan Ağa kabz edip ıskāt-ı salât ve kefâret-i savmım verile ve eyyâm-ı mu‘tâde[de] tabh-ı ta‘âm ve it‘âm-ı fukarâ ve sulehâ eyleyip sülüs-i mezbûrdan fazla kalırsa mezbûr el-Hâc Hasan Ağa kendi mesârifine sarf eyleye ve aslâ vârisim olmamağla terekemin sülüsânı babam mezbûr Mehmed Ağa’nın mu‘takası Mülayim bt. Abdullah’ın kızı Fâtıma’nın kızları Âişe ve Emine bintey Ali nâm hatunlara ale’s-seviye verile ve zikr olunan vesâyâmı tenfîze mezbûr el-Hâc Hasan Ağa’yı nasb ve ta‘yîn eyledim dedikde ol dahi vesâyet-i merkūmeyi kabûl ve merâsimini edâya ta‘ahhüd etmekle vâki‘ hâli mevlânâ-yı mezbûr mahallinde tahrîr ba‘dehû irsâl olunan Ahmed Çelebi b. Süleyman ile meclis-i şer‘a gelip vukū‘u üzere inhâ ve takrîr etmeğin mâ-vaka‘a kayd şüd. Fî 27 min-Rebî‘ülâhir sene 1110. Şuhûdü’l-hâl: el-Hâc İbrahim b. Ebubekir, Hacı Mustafa b. Ahmed, Müezzin Salih Çelebi, Ömer b. Abdurrahman, el-Hâc Veli b. Abdullah