Kısmet-i Askeriye Mahkemesi 19 Numaralı Sicil (H. 1109-1110 / M. 1698-1699) cilt: 58, sayfa: 565 Hüküm no: 432 Orijinal metin no: [103b-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Ayşe Hatun’un vefatıyla beytülmâle kalan sirkehanenin yarı hissesini eşi Musa Ağa’nın satın aldığı Husûs-ı âti’l-beyânın mahallinde ketb ü tahrîri iltimâs olunmağın cânib-i şer‘den me’zûnen Mevlânâ Mehmed Efendi b. Mahmud irsâl olunup ol dahi mahmiye-i İstanbul’da Firuz Ağa mahallesinde Musa Ağa b. Mustafa nâm kimesnenin menziline varıp zeyl-i vesîkada muharrerü’l-esâmî Müslimîn huzûrlarında akd-i meclis-i şer‘-i nebevî ettikde menzil-i mezbûrda sâkine iken bundan akdem vefât eden Âişe Hatun bt. Abdullah’ın zâhirde zevc-i metrûku mezbûr Musa Ağa’dan gayrı vâris-i ma‘rûfu olmamağla terekesinin nısfı mezbûr Musa Ağa’ya ve ve nısf-ı âharı cânib-i beytülmâle âid oldukdan sonra Mahmiye-i mezbûrede bi’l-fi‘il beytülmâl-i hâs emîni Mustafa Ağa b. Abdurrahman b. Abdurrahman tarafından müseccel vekîli ve kıbel-i şer‘den husûmet ve redd-i cevâba me’zûn olan Mehmed Çelebi b. Mustafa meclis-i ma‘kūd-ı mezbûrda işbu râkımü’l-kitâb mezbûr Musa Ağa mahzarında bi’l-vekâle ikrâr ve takrîr-i kelâm edip arsasının merhûm İskender Ağa Vakfı’na on akçe mukāta‘ası olup ebniyesi müteveffât-ı mezbûre ile’l-vefât yedinde mülk ve hakkı olup mahalle-i mezbûrede vâki‘ bir tarafdan Mehterhâne ve bir tarafdan Mehterbaşı Ali Ağa menziline ve bir tarafdan merkūm Musa Ağa menziline ve bir tarafdan tarîk-i hâssa müntehî fevkānî tahtânî bir bâb sirkehânenin cânib-i beytülmâle âid olan nısf-ı şâyi‘-i âharını ba‘de’l-müzâyede ve inkıtâ‘i’r-rağbet mezbûr Musa Ağa’ya tarafeynden îcâb ve kabûlü hâvî bey‘-i bâtt-ı sahîh-i şer‘î ile yirmi beş guruşa bey‘ ve temlîk ve teslîm ol dahi minvâl-i muharrer üzere iştirâ ve temellük ve kabûl edip semen olan meblağ-ı merkūm yirmi beş guruşu mezbûr Musa Ağa yedinden tamâmen alıp kabz eyledim ba‘de’l-yevm mahdûd-ı mezkûr sirkehânenin nısfı irsen ve nısf-ı âharı şirâen merkūm Musa Ağa’nın mülk-i müşterâsıdır, keyfe mâ yeşâ ve yehtâr mutasarrıf olsun dedikde gıbbe’t-tasdîkı’ş-şer‘î vâki‘ hâli mevlânâ-yı mezbûr mahallinde ketb ü tahrîr ba‘dehû ma‘an ba‘s olunan Mehmed b. Hasan ve Mustafa b. Mehmed ile meclis-i şer‘a gelip vukū‘u üzere inhâ ve takrîr etmeğin mâ-vaka‘a kayd şüd. Hurrire fî 28 min-şehri Rebî‘ülâhir sene 1110. Şuhûdü’l-hâl: Mehmed Efendi b. Mahmud el-imâm, İbrahim Efendi b. Mustafa, Halil Çelebi b. Mustafa, Musa Çelebi b. Kenan, Mehmed Çelebi b. Fazlullah