.:: İstanbul Kadı Sicilleri ::.


Kısmet-i Askeriye Mahkemesi 19 Numaralı Sicil (H. 1109-1110 / M. 1698-1699)
cilt: 58, sayfa: 566
Hüküm no: 433
Orijinal metin no: [104a-1]
Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır.


Hasan Ağa’nın vefatıyla çocuklarının üzerine İsmail b. Abdullah’ın vasi tayin edildiği

Mahmiye-i İstanbul’da Süleyman Ağa mahallesi ahâlîsinden olup Güzel Hisar’da vefât eden Hasan Ağa b. Mustafa b. Abdullah’ın verâseti vâlidesi Fâtıma Hatun bt. Abdullah ile babası mezbûr Mustafa’ya ve sagīr oğulları Mehmed ve Mahmud ile sagīre kızı Âişe’ye münhasıra oldukdan sonra zikr olunan sagīrlerin tesviye-i umûrlarına bir vasî nasb ü ta‘yîn olunmak lâzım ve mühim olmağın emânet ve diyânet ile ma‘rûf ve vesâyet uhdesinden gelmeye kādir idiği zeyl-i kitâbda isimleri mastûr Müslimîn haberleri ile lede’ş-şer‘i’l-enver zâhir olan mahmiye-i mezbûrede Güngörmez mahallesinde sâkine hâfızü’l-kitâb el-Hâc İsmail b. Abdullah’ı hâkim-i muvakkı‘-ı sadr-ı kitâb tûbâ-lehû ve hüsnü-meâb efendi hazretleri sagīr-i mezbûrların tesviye-i umûrlarına vakt-i rüşd ü sedâdlarına varınca vasî nasb ü ta‘yîn buyurduklarında ol dahi vesâyet-i mezbûreyi ba‘de’l-kabûl merâsimini edâya müte‘ahhid olmağın mâ-vaka‘a bi’t-taleb ketb olundu.

Fi’l-yevmi’t-tâsi‘ ve’l-ışrîn min-Rebî‘ülâhir sene 1110.

Şuhûdü’l-hâl: İbrahim Bey b. el-merhûm Ali Paşa, fahrü’l-müderrisîn Mehmed Efendi, Hasan Efendi b. Eyüb el-imâm, el-Hâc Ahmed b. Mehmed el-müezzin, el-Hâc Abdurrahman Ağa, Derviş Ahmed, Abdurrahman Ağa b. Mehmed, Mehmed Çelebi b. Hasan, Ali Ağa b. Mustafa