Kısmet-i Askeriye Mahkemesi 19 Numaralı Sicil (H. 1109-1110 / M. 1698-1699) cilt: 58, sayfa: 573 Hüküm no: 443 Orijinal metin no: [105a-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Vefat eden Mehmed Ağa’nın oğlu reşit olduğundan babasından kalan malları vasisinden aldığı Medîne-i Ebî Eyyûb Ensârî nevâhîsinden Silivri’ye tâbi‘ Haraccı karyesinde sâkin iken vefât eden Mehmed Ağa b. Ramazan’ın oğlu Abdullah’ın oğlu ve hasren vârisi olup mahmiye-i İstanbul’da Zeyni Çelebi mahallesinde müsâfiren sâkin ve sinni cüssesinin bülûğuna tahammülü ve bülûğuna rüşdünün inzimâmını iddi‘â eden İsmail Çelebi mahfil-i kazâda hâl-i sıgārında vasiyy-i muhtârı olmağla hisse-i müntakilesine vaz‘-ı yed eden bâ‘isü’l-vesîka Osman Efendi b. Mehmed mahzarında üzerine da‘vâ ve takrîr-i kelâm edip hâlâ ben bâliğ ve reşîd ve nef‘ ü zarârı âlim ve umûruma i‘ânet-i vasîden müstağnî olmağla vech-i mezbûr hesâbını gördüğümde ba‘de külli’l-hesâb yedinde bâkī kalan üç yüz seksen üç [akçe] hakkımı taleb eylediğimde bana teslîmden imtinâ‘ eder suâl olunsun dedikde gıbbe’s-suâl vasiyy-i mezbûr bülûğuna rüşdünün inzimâmı ma‘lûmum değildir deyicek [105b] müdde‘î-i mezbûrdan müdde‘âsına beyyine taleb olundukda udûl-ı Müslimînden Hüseyin Beşe b. Eyüb ve Mustafa Beşe b. Receb ve Mehmed Çelebi b. Hüseyin li-ecli’ş-şehâde meclis-i şer‘a hâzırân olup isre’l-istişhâd fi’l-hakīka işbu müdde‘î-i mezbûr İsmail hâlâ bâliğ ve reşîd ve nef‘ ü zarârını âlim ve umûruna i‘ânet-i vasîden müstağnîdir, biz bu husûsa bu vech üzere şâhidleriz, şehâdet dahi ederiz deyü her biri edâ-i şehâdet-i şer‘iyye ettikde ba‘de’t-ta‘dîl mûcebince meblağ-ı bâkī-yi mezbûru müdde‘î-i mezbûra edâya vasiyy-i mezbûra tenbîh olundukdan sonra mezbûr İsmail meclis-i mezbûrda vasiyy-i mezbûr muvâcehesinde ikrâr ve i‘tirâf edip ânifen edâsına tenbîh olunan meblağ-ı mezbûr üç yüz seksen üç akçe ile karye-i mezbûrede vâki‘ mülk menzili yedinden alıp kabz eyledim ba‘de’l-yevm hisseme isâbet eden mîrâs da‘vâsından vasiyy-i mezbûr zimmetini ibrâ ve ıskāt eyledim dedikde gıbbe’t-tasdîkı’ş-şer‘î mâ-vaka‘a bi’t-taleb ketb olundu. Hurrire fî 2 min-Cumâdelûlâ sene 1110. Şuhûdü’l-hâl: Mustafa Bey b. Mehmed, el-Hâc Mehmed Efendi, Mehmed b. Hüseyin, Kara Yusuf Efendi b. Veli, Hasan Efendi b. Mehmed