Kısmet-i Askeriye Mahkemesi 19 Numaralı Sicil (H. 1109-1110 / M. 1698-1699) cilt: 58, sayfa: 571 Hüküm no: 442 Orijinal metin no: [105a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Mustafa Ağa’nın kurduğu para vakfına, vefat eden mütevelli Halil Ağa’nın borcu olduğu Mahmiye-i İstanbul’da Süleymaniye kurbünde Mollagürânî mahallesinde sâkin iken bundan akdem vefât eden Mustafa Ağa b. Abdurrahman Ağa nâm sâhibü’l-hayrın nukūd-ı mevkūfesine bi’l-fi‘il mütevellî olan hâfızü’l-kitâb Mehmed Çelebi b. İbrahim meclis-i şer‘de mahmiye-i mezbûrede Hamamcı Ali mahallesinde sâkin iken bundan akdem vefât eden Halil Ağa b. Mustafa b. Mehmed’in üvey sıgārının tesviye-i emrlerine kıbel-i şer‘den vasiyy-i mansûbları olmağla terekesine bi’l-vesâye vaz‘-ı yed eden Abdüllatif b. İsmail mahzarında bi’t-tevliye üzerine da‘vâ ve takrîr-i kelâm edip bin doksan üç senesinde vâkıf-ı mezbûr Mustafa Ağa hâl-i marazında bi-emrillâhi te‘âlâ vefât edersem cemî‘ malımın sülüsünü kabz eyleyip re’y ve ma‘rifetinle dilediğin mahfillere vakfeyle deyü müteveffâ-yı mezbûr Halil Efendi’yi vasiyy-i muhtâr nasb ü ta‘yîn edip ol dahi ba‘de’l-kabûl musırran-aleyhâ mezbûr Mustafa vefât eyledikden sonra müteveffâ-yı mezbûr Halil Ağa vakf-ı mezbûrun cemî‘ malının sülüsünü ahz u kabz ve sülüs-i mezbûrdan sekiz yüz guruşunu ifrâz ve zabt edip vazîfeleri meblağ-ı mezbûrun nemâsından verilmek üzere Süleymaniye Câmi‘-i şerîfine şeyhü’l-kurrâ ve Şehzâde Câmi‘-i şerîfine va‘ziye nasb ü ta‘yîn eyledikden sonra meblağ-ı mevkūf-ı mezbûra yine mezbûr Halil Ağa kendi mütevellî olmağla ta‘yîn olunan vazîfeleri meblağ-ı mezbûrun nemâsından ashâbına edâ ve teslîm üzere olup hattâ bin yüz dokuz senesi Receb-i şerîfinde müteveffâ-yı mezbûr Halil Ağa Edirne’ye gider oldukda vâkıf-ı mezbûr Mustafa Ağa b. Abdurrahman Ağa’nın terekesi sülüsünden vakfeylediğim bin yüz guruşu bi’t-tevliye ben ahz u kabz ve kendi mesârifime sarfla istihlâk eyledim. Meblağ-ı merkūm bin yüz guruş zimmetimde vakfa vâcibü’l-edâ ve lâzımü’l-kazâ deynim vardır deyü alâ-ruûsi’l-işhâd ikrâr ve işhâd edip meblağ-ı mezbûru kable’l-edâ fevt olmağla terekesinden taleb ederim suâl olunsun dedikde gıbbe’s-suâl vasiyy-i mezbûr cevâbında müteveffâ-yı mezbûr Halil Ağa’nın terekesine vech-i muharrer üzere vaz‘-ı yedini ikrâr ve mütevellî-i mezbûrun vech-i muharrer müdde‘âsını inkâr edicek mütevellî-i mezbûrdan müdde‘âsına beyyine taleb olundukda udûl-ı ahrâr-ı ricâl-i Müslimînden Çakır Ağa mahallesi sükkânından Osman Efendi b. Abdullah ve zikr olunan Mollagürânî mahallesi sükkânından Osman Efendi b. Hasan li-ecli’ş-şehâde meclis-i şer‘a hâzırân olup istişhâd olunduklarında fi’l-hakīka müteveffâ-yı mezbûr Halil Ağa b. Mustafa b. Mehmed târîh-i mezbûrda Edirne’ye gider oldukda vâkıf-ı mezbûr Mustafa Ağa b. Abdurrahman Ağa’nın terekesi başdan vakfeylediğim bin yüz guruşu bi’t-tevliye ben ahz u kabz ve kendi mesârifime sarfla istihlâk eyledim, meblağ-ı merkūm bin yüz guruş zimmetimde vakf-ı mezbûra vâcibü’l-edâ ve lâzımü’l-edâ ve vâcibü’l-kazâ deynim vardır deyü huzûrumuzda ikrâr ve bizi işhâd eyledi, bu husûsa bu vech üzere şâhidleriz şehâdet ederiz deyü her biri edâ-i şehâdet-i şer‘iyye eyledikde gıbbe’t-ta‘dîl ve’t-tezkiye şehâdetleri makbûle ve müdde‘î-i mezbûrun husûs-ı mezbûrda sun‘u olmamağla yemîn teveccüh etmemeğin mûcebiyle ba‘de’l-hükm mâ-vaka‘a kayd şüd. Hurrire 22 min-Rebî‘ülâhir sene 1110. Şuhûdü’l-hâl: Müsta‘id Mustafa Efendi, Abdülmuti Efendi, eş-Şeyh Ebubekir Efendi birâderleri Abbas Çelebi, Ahmed b. Osman, Şemsi Ahmed Efendi, Nükâtî Ali Efendi b. Osman