Kısmet-i Askeriye Mahkemesi 19 Numaralı Sicil (H. 1109-1110 / M. 1698-1699) cilt: 58, sayfa: 575 Hüküm no: 446 Orijinal metin no: [105b-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Eyüb b. Abdullah’ın terekesi Yoros kazâsına tâbi‘ Kavakhisarı müstahfızlarından olup bundan akdem Hama’da düyûnu terekesinden ezyed olduğu halde vefât eden Eyüb b. Abdullah nâm mustahfızın verâseti zevce-i menkûha-i metrûkesi Havva Hatun bt. Mehmed’e ve sagīr oğlu Abdullah ve sagīre kızı Hadîce’ye münhasıra olduğu şer‘an zâhir oldukdan sonra zikr olunan sagīrlerin tesviye-i emrlerine [106a] ve müteveffânın düyûnunu ashâbına îfâya kıbel-i şer‘den vasiye nasb olunan hisar-ı mezbûrda sâkine sagīrlerin büyük vâlideleri Emine Hatun bt. Hüseyin ve üzerine hasbî nâzır nasb olunan sagīrlerin vâlideleri mezbûre Havva Hatun ve Kavak’da hâlâ üstâd olan fahrü’l-a‘yân Mehmed Ağa b. el-merhûm Mehmed Efendi ile tâife-i mezbûrenin evlâd-ı sıgārının üzerlerine bâ-hatt-ı hümâyûn-ı şevket-makrûn nezâret-i aliyyeleri olan Hadîka-i hâssa-i şehriyârîde hâlâ Bostancıbaşı olan umdetü’l-havâs ve’l-mukarrebîn mu‘temedü’l-mülûk ve’s-selâtîn izzetlü Mustafa Ağa b. Hüseyin b. Mehmed’in Kuşçubaşısı ve tarafından müseccel vekîli Osman Bey b. Süleyman taleb ve ma‘rifetleriyle müteveffâ-yı mezbûrun tahrîr ve fürûht olunan terekesidir ki vech-i âtî üzere zikr olunur. Fî 26 min-Rebî‘ülâhir sene 1110. Yasdık 3 200 akçe Beledî minder 1 240 akçe Yemenî yorgan 100 akçe Siyâh kebe 1 60 akçe Köhne keçe kilim 2 30 akçe Mâî şalvar 1 60 akçe Münakkaş çuka nîmten-i köhne 1 100 akçe Bogası kapama 2, anteri 1 250 akçe Köhne kırmızı kürk 1 50 akçe Mukaddem-i köhne 1 100 akçe Yekûn eşyâ, para üçer akçe hesâbıncadır: 1.190 akçe Müteveffâ-yı mezbûrun hîn-i fevtinde zikr olunan Hama’da mevcûd bulunup Kapıcıbaşı Mustafa Ağa yediyle bu tarafa getirip hâlâ Bostancıbaşı Mustafa Ağa hazretlerinin Büyük Yazıcısı İbrahim Efendi b. Hüseyin’e teslîm ol dahi huzûr-ı Müslimînde vasiye-i mezbûreye teslîm eylediği eşyâ ve nukūdudur ki zikr ü beyân olunur. Hurrire fi’t-târîhi’l-mezbûr. Puşi 3 300 akçe Mısrî makrama 1 çift 120 akçe Sîm yüzük 1 40 akçe Arakıye 3 40 akçe Nukūd, 28 guruş, fî 120 3.360 akçe Yekûn-ı nukūd ve eşyâ, para üçer akçeyedir: 3.860 akçe Cem‘an yekûn: 5.050 akçe Minha’l-ihrâcât Dellâliye ve muhammine ve ücret-i kayık 400 akçe Resm-i ağa hazretleri 500 akçe İki kıt‘a hüccet-i harc 160 akçe Harc-ı defter 120 akçe Kaydiye-i defter 20 akçe Yekûn ihrâcât: 1.200 akçe Sahhe’l-bâkī: 3.850 akçe Müteveffâ-yı mezbûrun zevcesi mezbûre Havva Hatun’un zevci müteveffâ-yı mezbûr Eyüb zimmetinde beş bin sağ akçe mehr-i müeccel hakkı olduğu vasiye-i mezbûre Emine Hatun mahzarında kal‘a-i mezbûrede sâkin Mustafa Bey b. Receb ve Ali Beşe b. Mustafa şehâdetleriyle şer‘an sâbit olup ba‘de’t-tahlîf edâsına hükm-i şer‘î lâhık olmağla meblağ-ı mezbûr mukābelesinde meblağ-ı bâkī-yi mezbûr üç bin sekiz yüz elli akçeyi mezbûre Havva Hatun vasiye-i mezbûre yedinden ahz u kabz eylediği bu mahalle şerh verildi.