Kısmet-i Askeriye Mahkemesi 19 Numaralı Sicil (H. 1109-1110 / M. 1698-1699) cilt: 58, sayfa: 579 Hüküm no: 449 Orijinal metin no: [106b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Mustafa Bey’in varislerinden kardeşi olduğunu iddia eden Mehmed’in terekeden hakkını aldığı Husûs-ı âti’l-beyânın mahallinde istimâ‘ ve tahrîri iltimâs olunmağın kıbel-i şer‘-i enverden me’zûnen irsâl olunan Mevlânâ el-Hâc Abdurrahman Efendi b. Mustafa el-Âmidî mahmiye-i İstanbul’da Elvanzâde mahallesinde sâkin iken bundan akdem vefât eden Bahçekapısı ahâlîsinden Mustafa Bey b. Derviş menziline varıp zeyl-i kitâbda muharrerü’l-esâmî Müslimîn huzûrlarında akd-i meclis-i şer‘-i şerîf ettikde fi’l-asl vilâyet-i Rumeli’nde Elbasan kazâsından olup hâlâ Karaki mahallesinde müsâfiren sâkin müteveffâ-yı mezbûrun li-ebeveyn karındaşı ve usûbet-i nesebiye cihetinden hasren vârisi olduğunu iddi‘â eden hâfızü’l-kitâb Mehmed b. Derviş meclis-i ma‘kūd-ı mezbûrda müteveffâ-yı mezbûrun sagīre kızı Ümmügülsüm’ün tesviye-i umûruna bâ-hüccet-i şer‘iyye vasiyy-i muhtârı olmağla [tereke]sine vaz‘-ı yed eden Bayram Bey b. Mahmud mahzarında üzerine da‘vâ ve takrîr-i kelâm edip ben müteveffâ-yı mezbûr Mustafa Bey ile li-ebeveyn karındaşlar olup vâlidemiz ismi Fâtıma bt. Ali ve babamız ismi mezbûr Derviş ve dedemiz ismi Mehmed ve maskat-ı re’simiz zikr olunan Elbasan kasabasıdır, zâhirde müteveffâ-yı mezbûrun zevcesi Hadîce bt. Bayram sümün hissesini ve kızı sagīre-i mezbûre nısf hissisini ahz ettiklerinden sonra bâkī üç sehme usûbeten benden gayrı vâris ve âhar müstahık yoğiken vasiyy-i mezbûr Bayram Bey’den taleb eylediğimde bana teslîmden imtinâ‘ eder suâl olunsun dedikde gıbbe’s-suâl vasiyy-i mezbûr cevâbında terekesine vech-i muharrer üzere vaz‘-ı yedini ikrâr ve müdde‘î-i mezbûrun vech-i meşrûh üzere müdde‘âsını inkâr edicek müdde‘î-i mezbûrdan sıdk-ı makāline beyyine taleb olundukda udûl-ı ahrâr-ı ricâl-i Müslimînden fi’l-asl mârrü’z-zikr Elbasan kasabası ahâlîsinden olup zikr olunan Karaki mahallesinde sâkin Mehmed Ağa b. Hasan ve Hadîka-i hâssa-i şehriyârîde sâkin Ömer Bölükbaşı b. Abdullah li-ecli’ş-şehâde meclis-i ma‘kūd-ı mezkûrda hâzırân olup isre’l-istişhâd fi’l-hakīka müdde‘î-i mezbûr Mehmed müteveffâ-yı mezbûr Mustafa Bey ile li-ebeveyn karındaşlardır, vâlideleri ismi mezbûre Fâtıma bt. Mehmed ve babaları ismi mezbûr Derviş ve dedeleri ismi mezbûr Mehmed ve maskat-ı re’sleri zikr olunan Elbasan kasabasıdır, zâhirde müteveffâ-yı mezbûrun zevcesi mezbûre Hadîce Hatun bt. Bayram sümün hissesi ve kızı sagīre-i mezbûre Ümmügülsüm nısf hissesini ahz ettiklerinden sonra bâkī üç sehme usûbeten müdde‘î-i mezbûr Mehmed’den gayrı vâris ve terekesine âhar müstahık olduğu ma‘lûmumuz değildir, biz bu husûsa bu vech üzere şâhidleriz şehâdet dahi ederiz deyü her biri edâ-i şehâdet-i şer‘iyye ettikde ba‘de’t-ta‘dîl ve’t-tezkiye şehâdetleri makbûle olmağın mûcebince ba‘de’l-hükm müdde‘î-i mezbûr yine meclis-i ma‘kūd-ı mezkûrda vasiyy-i mezbûr Bayram Bey mahzarında ikrâr ve takrîr-i kelâm edip müteveffâ-yı mezbûrun terekesi tahrîr ve ba‘de ihrâci’l-mesârif ve’d-düyûn ve’s-sülüs ber-mûceb-i defter-i kassâm-ı askerî tashîh-i mezbûr üzere üç sehmim mukābelesinde bana isâbet eden para dört akçe hesâbınca altı bin akçe hakkımı terekeden olmak üzere vasiyy-i mezbûr Bayram Bey yedinden tamâmen ahz u kabz eyledim min-ba‘d meblağ-ı mezbûrdan yedinde ve zimmetinde bir akçe bâkī kalmadı, müteveffâ-yı mezbûrun zimem-i nâsda olan hukūkundan mâ‘adâ dâhil-i defter ve hâric ez-defter kalîl ü kesîr ve celîl ü hakīr terekeden hukūk-ı mîrâsa müte‘allık âmme-i de‘âvîden vasiyy-i mezbûrun zevcesi mezbûre Hadîce’nin ve sagīre-i mezbûre Ümmügülsüm’ün zimmetlerini ibrâ-i âm ile ibrâ ve ıskāt eyledim dedikde gıbbe’t-tasdîkı’ş-şer‘î vâki‘ hâli mevlânâ-yı mezbûr mahallinde tahrîr ba‘dehû ma‘an irsâl olunan Hasan Çelebi b. Abdullah ve Mehmed b. Ahmed ile meclis-i şer‘a gelip alâ-vukū‘ihi inhâ ve takrîr etmeğin mâ-vaka‘a kayd şüd. Fî 3 min-Cumâdelûlâ sene 1110. Şuhûdü’l-hâl: Mehmed Halilzâde b. el-müezzin, Berber Ali Çelebi b. Osman, Berber el-Hâc Yusuf b. Abdullah, Mehmed Çelebi b. Ali za‘îm, Abdurrahman Çelebi el-attâr, Ahmed Bey b. Murad, Mehmed b. Ahmed bostânî, Mustafa Bey b. Murad bazârî, Ramazan Bey b. (°) ve gayruhum