Kısmet-i Askeriye Mahkemesi 19 Numaralı Sicil (H. 1109-1110 / M. 1698-1699) cilt: 58, sayfa: 578 Hüküm no: 448 Orijinal metin no: [106b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Vefat eden Hüseyin Ağa’nın kızı Ümmühani’nin vasisi olan Hüseyin’in azledilerek yerine annesi Bâdısabâ’nın vasi tayini Mahmiye-i İstanbul’da Esirci Kemâl mahallesinde sâkine iken bundan akdem vefât eden Münâdî? el-Hâc Hüseyin Ağa b. Oruc’un sulbiye sagīre kızı Ümmühani’nin vasiyy-i muhtârı olan diğer Hüseyin Ağa b. Receb’in üzerine nâzır-ı muhtârı olan Ali Çelebi b. Habib ile nâzır-ı mansûbesi Bâdısabâ Hatun bt. Abdullah mahfil-i kazâda vasiyy-i mezbûr üzerine da‘vâ ve takrîr-i kelâm edip mezbûr Hüseyin Ağa sagīre-i mezbûrenin tesviye-i umûruna târîh-i kitâbdan altı ay mukaddem vasiyy-i muhtârı olmağla defter-i kassâm-ı askerî mûcebince mal-ı müntakili zabt edip hâric ez-defter mezbûr terekeden iki yemenî hâtem ve dört sagīr la‘l taş ve on yedi inci ve iki sagīr zümrüd taş ve altı miskāl anber ve sekiz yüz nakid guruş ketm ve ihfâ etmişdir, suâl olunsun dediklerinde vasiyy-i mezbûr cevâbında zikr olunan anber ve nakid sekiz yüz guruşu inkâr ve mâ‘adâyı defter-i kassâma tahrîr ettirmeyip ketm ü ihfâ ettiğini ikrâr ve i‘tirâf ettikde Kadıhan’ın Kitâb-ı Şuf‘a’nın meselinde? İmâm Yusuf hazretlerinden rivâyet olunan kavl-i mu‘tâde üzere azli lâzım gelmekle vasiyy-i mezbûr vesâyet-i mezbûresinden azlolunup yerine vasî nasb ü ta‘yîn olunması lâzım ve mühim olmağın emânet ve diyânet ile ma‘rûfe ve vesâyet-i mezbûreyi görmeye kādire ve müstakīme idiği zeyl-i kitâbda muharrerü’l-esâmî Müslimîn ihbârı ile zâhir ve müte‘ayyen oldukda sagīre-i mezbûrenin vâlidesi râfi‘atü’l-kitâb mezbûre Bâdısabâ Hatun’u hâkim-i muvakkı‘-ı sadr-ı kitâb efendi hazretleri vasiyy-i ma‘zûlün yerine vasî nasb ü ta‘yîn buyurduklarında ol dahi vesâyet-i mezbûreyi ba‘de’l-kabûl nâzır-ı muhtâr-ı mezbûr Ali Çelebi’nin re’y ve ma‘rifetleriyle umûr-ı vesâyetinden bir emre mübâşeret etmemek üzere mezbûre Bâdısabâ’ya tenbîh birle mâ-vaka‘a bi’t-taleb kayd şüd. Gurre fî Cemâziyelevvel sene 1110. Şuhûdü’l-hâl: Mukayyid Mustafa Efendi b. Hasan, Abdurrahman Efendi b. Ahmed Efendi, Ali Efendi b. Ahmed, Ahmed Efendi b. Mahmud, Süleyman Efendi el-müezzin, Hüseyin Ağa b. İbrahim, Abdulkadir Efendi el-müezzin, Rûşenî Mehmed Efendi b. İbrahim, Eşrefî? Ali b. Mehmed