Kısmet-i Askeriye Mahkemesi 19 Numaralı Sicil (H. 1109-1110 / M. 1698-1699) cilt: 58, sayfa: 581 Hüküm no: 451 Orijinal metin no: [107a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Ahmed b. Süleyman’ın hanımı Ümmühani Hatun’un terekeden mehrini aldığı Husûs-ı âti’l-beyânın mahallinde istimâ‘ ve tahrîri içün cânib-i şer‘-i mutahhardan bi’t-taleb me’zûnen irsâl olunan Süleyman Efendi b. el-merhûm Mehmed Efendi mahmiye-i İstanbul’da Hoca Kasım Gönânî mahallesi ahâlîsinden olup tarîk-i hacc-ı şerîfde vefât eden el-Hâc Ahmed b. Süleyman’ın menziline varıp zeyl-i vesîkada muharrerü’l-esâmî Müslimîn huzûrlarında akd-i meclis-i şer‘-i şerîf ettikde müteveffâ-yı mezbûrun zevce-i menkûha-i metrûkesi olup zâtı Mahmiye-i mezbûrede Soğan Ağa mahallesinde sâkin Mustafa Çelebi b. Hüseyin ve Osman Efendi b. Hüseyin ta‘rîfleriyle mu‘arrefe olan bâ‘isetü’l-vesîka Ümmühani Hatun bt. Mahmud meclis-i ma‘kūd-ı mezbûrda müteveffâ-yı mezbûrun evlâd-ı sıgārının tesviye-i emrlerine tashîh li’d-da‘vâ vasî nasb olunan Molla Mehmed b. Sadık mahzarında üzerine da‘vâ ve takrîr-i kelâm edip müteveffâ-yı mezbûr el-Hâc Ahmed b. Süleyman b. Abdullah hayâtında târîh-i kitâbdan on üç sene mukaddem tezevvüc murâd ettikde beni huzûr-ı Müslimînde altı bin sağ akçe mehr-i müeccel tesmiyesiyle tezevvüc ve kabûl edip akd-i nikâh beynimizde kāim iken meblağ-ı mezbûru kable’l-edâ fevt olmağla terekesinden taleb ederim suâl olunsun dedikde gıbbe’s-suâl ve’l-inkâr müdde‘iye-i mezbûreden müdde‘âsına beyyine taleb olundukda udûl-ı ahrâr-ı ricâl-i Müslimînden mu‘arrifân ve mezbûrân Mustafa Çelebi b. Hüseyin ve Osman Efendi b. Hüseyin li-ecli’ş-şehâde meclis-i ma‘kūd-ı mezbûra hâzırân olup isre’l-istişhâd fi’l-hakīka el-Hâc Ahmed b. Süleyman b. Abdullah hayâtında târîh-i kitâbdan on üç sene mukaddem tezevvüc murâd ettikde işbu müdde‘iye-i mezbûre Ümmühani Hatun bt. Mahmud’u bizim huzûrumuzda altı bin akçe mehr-i müeccel tesmiyesiyle tezevvüc ve kabûl edip akd-i nikâh beynlerinde kāim iken vefât eyledi, biz bu husûsa bu vech üzere şâhidleriz şehâdet dahi ederiz deyü her biri edâ-i şehâdet-i şer‘iyye ettikde ba‘de’t-ta‘dîl ve’t-tezkiye şehâdetleri makbûle olmağın gıbbe’t-tahlîfi’ş-şer‘î mûcebiyle ba‘de’l-hükm vâki‘ hâli mevlânâ-yı mezbûr mahallinde ketb ü tahrîr ba‘dehû ma‘an ba‘s olunan Ahmed b. Süleyman ile meclis-i şer‘a gelip inhâ ve takrîr mâ-vaka‘a kayd şüd. Fî 3 min-Cumâdelûlâ sene 1110. Şuhûdü’l-hâl: Ahmed Çelebi b. Hüseyin, Mehmed Efendi b. Sadık, Mehmed Çelebi b. Mahmud, Ahmed Çelebi b. (°) berber, Mustafa Çelebi b. Hüseyin