Kısmet-i Askeriye Mahkemesi 19 Numaralı Sicil (H. 1109-1110 / M. 1698-1699) cilt: 58, sayfa: 585 Hüküm no: 457 Orijinal metin no: [108a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Vefat eden Aşçıbaşı Ali’nin varislerinin Mısır’daki mallarına ait hisselerini aldıkları Mahmiye-i İstanbul’da Altıboğça mahallesi ahâlîsinden olup bundan akdem Mısr-ı Kāhire’de vefât eden Aşçıbaşı el-Hâc Ali b. Hüseyin’in verâseti zevce-i metrûkesi Havva Hatun bt. Mehmed ve Hadîce bt. Abdullah ile sagīre-i mezbûre Emetullah’a ve sulbî kebîr oğlu Mehmed’e münhasıra olup ve tashîh-i meselesi kırk sekiz sehmden olmağla sihâmı mezbûreden üçer sehmi mezbûretân Havva ve Hadîce’den her birine ve on dört sehmi sagīre-i mezbûre Emetullah’a ve yirmi sekiz sehmi mezbûr Mehmed’e isâbeti tahakkukundan sonra zâtı ta‘rîf-i şer‘î ile mu‘arrefe olan mezbûretân Havva ve Hadîce meclis-i şer‘de müteveffâ-yı mezbûrun Mısr-ı Kāhire’de hîn-i fevtinde yanında mevcûde olan terekesine bi’l-verâse vaz‘-ı yed eden râfi‘ü’l-kitâb mezbûr Mehmed mahzarında her biri ikrâr ve takrîr-i kelâm edip müteveffâ-yı mezbûrun Mısr-ı Kāhire’de hîn-i fevtinde yanında mevcûde olan terekesi tahrîr ve defter edip ba‘de ihrâci’l-mesârif Sahhe’l-bâkī ber-mûceb-i defter-i kassâm Mısır terekesinden bizim hisse-i şer‘iyyemize isâbet eden on akçe hesâbı üzere cem‘an on üç bin iki yüz doksan yedi sağ akçeyi mezbûr Mehmed tamâmen bize def‘ ü teslîm ve biz dahi her birimiz bi-kadri’l-hısâs yedinden ahz u kabz eyledik ba‘de’l-yevm ber-mûceb-i defter-i mezbûr merkūm Mehmed’in yedinde ve zimmetinde bir akçe ve bir habbe hakkım bâkī kalmayıp husûs-ı mezbûra müte‘allıka âmme-i da‘vâdan mezbûr Mehmed’in zimmetini ibrâ-i âmm-ı katı‘u’n-nizâ‘la ibrâ ve ıskāt eyledik dediklerinde gıbbe’t-tasdîkı’ş-şer‘î mâ-vaka‘a kayd şüd. Hurrire fî 24 min-Rebî‘ülâhir sene 1110. Şuhûdü’l-hâl: Mehmed Efendi b. Mahmud, Sinan Efendi b. Mehmed el-imâm, Ali Efendi b. Veliyüddin, Abdullah Çelebi b. Receb, Ahmed çelebi b. Mustafa