Kısmet-i Askeriye Mahkemesi 19 Numaralı Sicil (H. 1109-1110 / M. 1698-1699) cilt: 58, sayfa: 585 Hüküm no: 456 Orijinal metin no: [107b-4] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Yağlıkçı Hüseyin’in hayatta iken para vakfından aldığı borcun terekeden ödenmesi Mahmiye-i İstanbul’da Nevbahar mahallesi ahâlîsinden olup bundan akdem vefât eden Abro? demekle şehîr İbrahim Efendi b. Ahmed nâm sâhibü’l-hayrın nukūd-ı mevkūfesine meşrûtiyyet üzere bi’l-fi‘il mütevellî olan sulbî kebîr oğlu râfi‘ü’l-kitâb Hasan Efendi b. İbrahim mahfil-i kazâda mahmiye-i mezbûrede Tülbentci Hüsam mahallesinde sâkin iken bundan akdem vefât eden Yağlıkçı el-Hâc Hüseyin b. Abdurrahman b. Abdullah’ın zevce-i menkûha-i metrûkesi ve üvey sıgārının tesviye-i umûruna vasiye-i mansûbeleri olup zâtı ta‘rîf-i şer‘î ile mu‘arrefe olan Fâtıma Hatun bt. Abdullah mahzarında üzerine da‘vâ ve takrîr-i kelâm edip müteveffâ-yı mezbûr Yağlıkçı el-Hâc Hüseyin b. Abdurrahman b. Nasrullah’a mal-ı vakf-ı mezbûrdan bin yüz dokuz senesi Receb’i gurresinden yüz guruş edâ ve teslîm ol dahi istidâne ve tesellüm ve târîh-i mezbûrdan bir sene tamâmına değin devr-i şer‘î ile on beş guruş iltizâm-ı ribh ettikden sonra yedimde işbu mümzâ ve mahtûm deyn temessükünü verip kable’l-edâ fevt olmağla asl-ı mal olan meblağ-ı mezbûr yüz guruş ile hâl-i fevtine gelince sekiz ayda müctemi‘ olan on guruş bir rub‘u terekesinden taleb ederim suâl olunsun dedikde gıbbe’s-suâl ve’l-inkâr müdde‘î-i mezbûrdan sıdk-ı makāline beyyine taleb olundukda udûl-ı ahrâr-ı ricâl-i Müslimînden mahmiye-i mezbûrede Kâtib Murad mahallesinde sâkin Osman Efendi b. Şa‘bân ve Fenâyî Dede mahallesinde sâkin Ramazan Beşe b. Abdurrahman li-ecli’ş-şehâde meclis-i şer‘a hâzırân olup isre’l-istişhâd fi’l-vâki‘ müteveffâ-yı mezbûr Yağlıkçı el-Hâc Hüseyin b. Abdurrahman b. Nasrullah mütevellî-i mezbûr Hasan Efendi yedinden mal-ı vakf-ı mezbûrdan târîh-i mezbûrda huzûrumuzda yüz guruş istidâne ve kabz edip târîh-i mezbûrdan bir sene tamâmına değin devr-i şer‘î ile on beş guruş iltizâm-ı ribh eyledi, biz bu husûsa bu vech üzere şâhidleriz şehâdet dahi ederiz deyü her biri [108a] edâ-i şehâdet-i şer‘iyye edip gıbbe’t-tahlîf mûcebiyle asl-ı mal-ı vakf-ı mezbûr ile ribh-i mültezim-i mezbûrdan bâkī kalan on guruş tereke-i müteveffâ-yı mezbûrdan müdde‘î-i mezbûra teslîme mezbûre Fâtıma’ya ba‘de’t-tenbîh mâ-vaka‘a kayd şüd. Fî 20 min-Rebî‘i’l-evvel li-sene aşer ve mi’e ve elf. Şuhûdü’l-hâl: Yahya Efendi b. Mustafa, Rûşenî Mehmed Efendi, Ahmed Çelebi b. Süleyman, Mehmed Ağa b. Abdullah