Kısmet-i Askeriye Mahkemesi 19 Numaralı Sicil (H. 1109-1110 / M. 1698-1699) cilt: 58, sayfa: 598 Hüküm no: 467 Orijinal metin no: [110b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Vefat eden Galatalı Mehmed Çavuş’un mecnun Ali’ye borcu olduğu Husûs-ı âti’l-beyânın mahallinde istimâ‘ ve tahrîri iltimâs olunmağın savb-ı şer‘-i enverden me’zûnen irsâl olunan Mevlânâ İmâmzâde Mehmed Efendi b. Ahmed Efendi Dârü’l-hilâfeti’l-aliyye Kostantıniyyetül-mahmiye hısnı ebvâbından Fenerkapısı dâhilinde Cafer Subaşı mahallesi ahâlîsinden olup bundan akdem vefât eden Galatalı Mehmed Çavuş b. Abdurrahman b. Abdülmennan’ın ilâ-vefâtihî sâkin olduğu menzile varıp zeyl-i kitâbda muharrerü’l-esâmî Müslimîn huzûrunda akd-i meclis-i şer‘-i şerîf eyledikde müteveffâ-yı mezbûrun verâseti kezâlik verese-i mezbûrûna münhasıra oldukdan sonra mahalle-i mezbûre ahâlîsinden olup cünûn-ı mutbık ile mecnûn olan Ali b. Abdullah’ın hâlâ vasiye-i şer‘iyyesi olup zâtı Mehmed b. Ahmed ve Mahmud b. Mehmed ta‘rîfleriyle mu‘arrefe olan işbu sâhibetü’l-kitâb mezbûre Âişe Hatun meclis-i mezbûrda zâtları mu‘arrifân-ı mezbûrân ta‘rîfleriyle mu‘arrefe olup müteveffâ-yı mezbûrun terekesine vâzı‘atü’l-yed olan mezbûretân Fâtıma ve Afife mahzarlarında bi’l-vesâye üzerlerine da‘vâ ve takrîr-i kelâm edip müteveffâ-yı mezbûr Galatalı Mehmed Çavuş b. Abdurrahman b. Abdülmennan ilâ-vefâtihî vasiyesi olduğum ammim mecnûn mezbûr Ali’nin bundan mukaddem vasîsi olmağla malından bi’l-vesâye makbûz olan beş yüz guruşunu kendi mesârifine sarf ile istihlâk edip hattâ ber-vech-i muharrer meblağ-ı mezbûr beş yüz guruş mecnûn-ı mezbûr Ali’ye zimmetinde deyni olduğunu hâl-i kemâl-i sıhhatinde târîh-i kitâbdan iki ay mukaddem mahzar-ı Müslimîn’de ikrâr ve işhâd eyledikden sonra zâmin olmadan fevt omağla terekesinden taleb ederim suâl olunsun dedikde gıbbe’s-suâl mezbûretân Fâtıma ve Afife cevâblarında fi’l-vâki‘ babaları müteveffâ-yı mezbûrun [terekesine] vâzı‘ateyi’l-yed olduklarını ikrâr lâkin deyn-i mezkûru inkâr eylediklerinde mezbûre Âişe Hatun’dan müdde‘âsına beyyine taleb olundukda udûl-ı Müslimînden mahalle-i mezbûre ahâlîsinden İmâm Veliyüddin Efendi b. Ahmed ve Müezzin Hüseyin Çelebi b. (°) li-ecli’ş-şehâde meclis-i mezbûra hâzırân olup isre’l-istişhâd fi’l-vâki‘ müteveffâ-yı mezbûr Galatalı Mehmed Çavuş b. Abdurrahman b. Abdülmennan vefâtına değin mecnûn-ı mezbûr Ali’nin vasîsi olmağla bi’l-vesâye makbûzu olan malından beş yüz guruşunu kendi mesârifine sarf ile istihlâk etmekle meblağ-ı mezbûr beş yüz guruş mezbûr Ali’ye zimmetinde deyni olduğunu hâl-i kemâl-i sıhhatinde târîh-i kitâbdan iki ay mukaddem bizim huzûrumuzda ikrâr ve bizi işhâd eyledi biz bu husûsa bu vech [üzere] şâhidleriz şehâdet ederiz deyü her biri edâ-i şehâdet-i şer‘iyye ettikde ba‘de’t-ta‘dîl ve’t-tezkiye şehâdetleri makbûle olmağın mûcebiyle ba‘de’l-hükm vâki‘ hâli mevlânâ-yı mezbûr kezâlik takrîr etmeğin mâ-vaka‘a kayd şüd. Fî 11 Rebî‘ülâhir sene 1110. Şuhûdü’l-hâl: Durmuş Beşe b. İvaz, el-Hâc Süleyman b. Receb, Mehmed Beşe b. Ahmed, el-Hâc Süleyman b. Abdullah