Kısmet-i Askeriye Mahkemesi 19 Numaralı Sicil (H. 1109-1110 / M. 1698-1699) cilt: 58, sayfa: 601 Hüküm no: 469 Orijinal metin no: [111a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Süleyman Ağa’nın vefat eden Sarraf Beşir’de alacağı olduğu Husûs-ı âti’l-beyânın mahallinde istimâ‘ ve tahrîri iltimâs olunmağın bu fakīr Âsitâne-i sa‘âdetde hâlâ Sadâret-i uzmâ vekâlet-i kübrâ kāimmakāmı olan düstûr-ı mükerrem müşîr-i mufahham nizâmü’l-âlem medâr-ı mesâlihü’l-ümem zü’l-kadri’r-refî‘ ve ilcâü’l-menba‘ devletlü sa‘âdetlü Yusuf Paşa hazretleri Alay Köşkü kurbünde vâki‘ saray-ı âlîlerinde kethüdâları olan umdetü’l-emâcid ve’l-ekârim izzetlü Ahmed Ağa’nın odasına varıp zeyl-i kitâbda muharrerü’l-esâmî Müslimîn huzûrlarında akd-i meclis-i şer‘-i hatîr olundukda mîrî sarrâflarından olup mahmiye-i mezbûrede Tülbentci Hüsam mahallesi ahâlîsinden iken bundan akdem fevt eden el-Hâc Beşir b. Abdullah b. Abdullah’ın zâhirde vâris-i ma‘rûfu olmamağla terekesi cânib-i beytülmâle âid olduğu şer‘an zâhir oldukdan sonra mahmiye-i mezbûrede Soğan Ağa mahallesi ahâlîsinden işbu râfi‘ü’l-kitâb Süleyman Ağa b. Mustafa meclis-i ma‘kūd-ı mezbûrda mahmiye-i mezbûrede yeniçeri beytülmâl emîni olmağla müteveffâ-yı mezbûrun terekesine vâzı‘u’l-yed olup husûs-ı âti’z-zikrde husûmet ve redd-i cevâba kıbel-i şer‘den me’zûn olan fahrü’l-akrân Hüseyin Ağa b. Muslu mahzarında üzerine da‘vâ ve takrîr-i kelâm edip müteveffâ-yı mezbûr el-Hâc Beşir b. Abdullah b. Abdullah zimmetinde cihet-i karzdan bin guruş hakkım olup hattâ müteveffâ-yı mezbûr fevtinden bir gün mukaddem hâl-i marazında huzûr-ı Müslimînde ikrâr ettikden sonra kable’l-edâ fevt olmağla terekesinden taleb ederim emîn-i mezbûrdan suâl olunsun dedikde gıbbe’s-suâl emîn-i mezbûr Hüseyin Ağa cevâbında fi’l-vâki‘ müteveffâ-yı mezbûrun terekesine bi’l-emâne vaz‘-ı yedini ikrâr lâkin deyn-i mezbûru inkâr edicek müdde‘î-i mezbûrdan müdde‘âsına beyyine taleb olundukda udûl-ı ahrâr-ı ricâl-i Müslimînden zikr olunan Tülbentci Hüsam mahallesinden el-Hâc İsmail b. Mustafa ve Muhsine Hatun mahallesinden Halil Çelebi b. İbrahim li-ecli’ş-şehâde meclis-i şer‘a hâzırân olup isre’l-istişhâd fi’l-vâki‘ müteveffâ-yı mezbûr Sarrâf el-Hâc Beşir b. Abdullah b. Abdullah fevtinden bir gün mukaddem müdde‘î-i mezbûr Süleyman Ağa’ya cihet-i karzdan bin guruş zimmetinde lâzımü’l-edâ deyni olduğunu bizim huzûrumuzda ikrâr ve işhâd eyledi biz bu husûsa bu vech üzere şâhidleriz şehâdet dahi ederiz deyü her biri edâ-i şehâdet-i şer‘iyye edip ba‘de’t-tahlîf mûcebiyle ba‘de’l-hükm ve’t-tenbîh mâ-vaka‘a bi’t-taleb kayd şüd. Fî gurre-i şehri Rebî‘i’l-evvel li-sene aşer ve mi’e ve elf. Şuhûdü’l-hâl: Umdetü’l-a‘yân Ahmed Ağa b. (°), Ömer Efendi b. Abdullah, el-Hâc Mustafa b. Mehmed, el-Hâc Abdullah, Mehmed Ağa b. Osman, Mustafa b. Ahmed