Kısmet-i Askeriye Mahkemesi 19 Numaralı Sicil (H. 1109-1110 / M. 1698-1699) cilt: 58, sayfa: 602 Hüküm no: 470 Orijinal metin no: [111a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Vefat eden Beşir’in Ermeni Haçok’a borcu olduğu Kezâlik cânib-i beytülmâle âid oldukdan sonra mahmiye-i mezbûrede Kumkapı kurbünde İbrahim Paşa mahallesinde sâkine ve hâlâ Darbhâne-i âmirede sâhib-i ayâr olan işbu râfi‘ü’s-sifr Haçok v. Nikifos nâm Ermeni meclis-i ma‘kūd-ı mezkûrda yeniçeri beytülmâl emîni olmağla tereke-i müteveffâ-yı mezbûra vâzı‘u’l-yed olup husûs-ı âti’z-zikrde husûmet ve redd-i cevâba kıbel-i şer‘den me’zûn olan Hüseyin Ağa b. Muslu mahzarında üzerine da‘vâ ve takrîr-i kelâm edip müteveffâ-yı mezbûr el-Hâc Beşir b. Abdullah b. Abdullah zimmetinde cihet-i karz-ı şer‘îden dört yüz Efrencî altın hakkım olup hattâ müteveffâ-yı mezbûr fevtinden bir gün mukaddem hâl-i marazında mahzar-ı Müslimînde ikrâr ve işhâd ettikden sonra kable’l-edâ fevt olmağla terekesinden taleb ederim suâl olunsun dedikde gıbbe’s-suâl ve’l-inkâr müdde‘î-i mezbûrdan müdde‘âsına beyyine taleb olundukda udûl-ı ahrâr-ı ricâl-i Müslimînden olup zikr olunan Tülbentci Hüsam mahallesinden olup el-Hâc İsmail b. Mustafa ve Soğan Ağa mahallesinden Ömer Efendi b. Abdullah li-ecli’ş-şehâde meclis-i ma‘kūd-ı mezbûra hâzırân olup isre’l-istişhâd fi’l-hakīka müteveffâ-yı mezbûr el-Hâc Beşir b. Abdullah b. Abdullah fevtinden bir gün mukaddem hâl-i marazında müdde‘î-i mezbûr sâhib-i ayâr Haçok Ermeni’ye cihet-i mezbûrdan zimmetinde dört yüz Efrencî altın lâzımü’l-edâ deyni olduğunu huzûrumuzda ikrâr ve işhâd eyledi, biz bu husûsa ilâ-âhirihî. Şuhûdü’s-sâbikūn