Kısmet-i Askeriye Mahkemesi 19 Numaralı Sicil (H. 1109-1110 / M. 1698-1699) cilt: 58, sayfa: 618 Hüküm no: 489 Orijinal metin no: [115a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Ahmed Ağa’nın vefat eden Mehmed Ağa’da alacağı olduğu Husûs-ı âti’l-beyânın mahallinde istimâ‘ ve tahrîri içün kıbel-i şer‘den bi’l-iltimâs me’zûnen irsâl olunan Mevlânâ Ali Rif‘atî Efendi b. el-Hâc Yusuf mahmiye-i İstanbul’da Bezzâz-ı cedîd mahallesinde sâkin iken bundan akdem vefât eden Surre Emîni el-Hâc Mehmed Ağa b. Şa‘bân b. Abdurrahman’ın menziline varıp zeyl-i kitâbda muharrerü’l-esâmî Müslimîn huzûrlarında akd-i meclis-i şer‘-i şerîf ettikde mahmiye-i mezbûrede Demirkapı kurbünde sâkin bâ‘isü’l-kitâb el-Hâc Ahmed Ağa b. Abdullah nâm kimesne meclis-i ma‘kūd-ı mezbûrda müteveffâ-yı mezbûrun evlâd-ı sıgārı Ahmed Çelebi ve İsmail ve Hadîce’nin tesviye-i emrlerine kıbel-i şer‘den mansûbe vasiyeleri olan Rukiye Hatun bt. Abdullah mahzarında üzerine da‘vâ ve takrîr-i kelâm edip müteveffâ-yı mezbûr el-Hâc Mehmed Ağa b. Şa‘bân b. Abdurrahman zimmetinde cihet-i karz-ı şer‘îden yüz guruş hakkım olup hattâ müteveffâ-yı mezbûr hâl-i kemâl-i sıhhatinde meblağ-ı mezbûr cihet-i mezbûreden zimmetinde bana deyni olduğunu huzûr-ı Müslimînde ikrâr ve işhâd dahi edip meblağ-ı mezbûru kable’l-edâ fevt olmağla tereke-i vâfiyesinden taleb ederim suâl olunsun dedikde gıbbe’s-suâl ve’l-inkâr müdde‘î-i mezbûrdan müdde‘âsına beyyine taleb olundukda udûl-ı ahrâr-ı ricâl-i Müslimînden zikr olunan Bezzâz-ı cedîd mahallesi ahâlîsinden el-Hâc Mustafa Ağa b. İbrahim ve el-Hâc Mehmed Ağa b. Abdülbaki li-ecli’ş-şehâde meclis-i ma‘kūd-ı mezbûra hâzırân olup isre’l-istişhâd fi’l-hakīka müteveffâ-yı mezbûr el-Hâc Mehmed Ağa b. Şa‘bân b. Abdurrahman hâl-i kemâl-i sıhhatinde işbu müdde‘î-i mezbûr el-Hâc Ahmed Ağa’ya cihet-i mezbûreden yüz guruş deyni olduğunu huzûrumuzda ikrâr ve bizi işhâd eyledi biz bu husûsa bu vech üzere şâhidleriz şehâdet dahi ederiz deyü her biri [şehâdet] eyledikde ba‘de’t-ta‘dîl ve’t-tezkiye şehâdetleri makbûle olmağın gıbbe’t-tahlîfi’ş-şer‘î mûcebiyle ba‘de’l-hükm vâki‘ hâli mevlânâ-yı mezbûr mahallinde ketb ü tahrîr ba‘dehû ma‘an ba‘s olunan Nasuh Beşe b. Yusuf ve İbrahim Çelebi b. Mehmed ile meclis-i şer‘a gelip inhâ etmeğin mâ-vaka‘a kayd şüd. Fî gurreti Cumâdelûlâ sene 1110. Şuhûdü’l-hâl: Umdetü erbâbi’t-tahrîr Tezkireci Mehmed Efendi, Mehmed Ağa b. Şa‘bân, el-Hâc Ahmed Ağa b. Abdullah, el-Hâc Mustafa b. İbrahim