Kısmet-i Askeriye Mahkemesi 19 Numaralı Sicil (H. 1109-1110 / M. 1698-1699) cilt: 58, sayfa: 631 Hüküm no: 494 Orijinal metin no: [117a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Çelebi Mehmed Ağa’nın vefat eden Beşir’deki hakkını terekeden aldığı Husûs-ı âti’l-beyânın mahallinde istimâ‘ ve tahrîri içün savb-ı şer‘den me’zûnen irsâl olunan İmâmzâde Mevlânâ Mehmed Efendi b. Ahmed Efendi mahmiye-i İstanbul’da Kızılmusluk kurbünde Baba Hasan Alemî mahallesinde sâkin sâbıkā Sekbanbaşı umdetü’l-emâcid ve’l-ekârim Hakkı Mehmed Ağa b. Mustafa’nın menziline varıp zeyl-i kitâbda muharrerü’l-esâmî Müslimîn huzûrlarında akd-i meclis-i şer‘-i nebevî eyledikde Dergâh-ı âlî yeniçerileri zümresi tarafından olup Mahmiye-i mezbûrede Tülbentci Hüsam mahallesinde sâkin iken bundan akdem vefât eden el-Hâc Beşir b. Abdullah b. Abdullah’ın zâhirde vâris-i ma‘rûfu olmayıp terekesi cânib-i beytülmâle âid oldukdan sonra mûmâ-ileyh Çelebi Mehmed Ağa meclis-i ma‘kūd-ı mezbûrda Mahmiye-i mezbûrede yeniçeri beytülmâl emîni olmağla tereke-i müteveffâ-yı mezbûra vâzı‘u’l-yed olup husûs-ı âti’z-zikrde husûmet ve redd-i cevâba kıbel-i şer‘den me’zûn olan fahrü’l-akrân el-Hâc Hüseyin Ağa b. Muslu mahzarında üzerine da‘vâ ve takrîr-i kelâm edip müteveffâ-yı mezbûr el-Hâc Beşir b. Abdullah b. Abdullah zimmetinde cihet-i karz-ı şer‘îden dört yüz yetmiş sekiz guruş hakkım olup hattâ müteveffâ-yı mezbûr hâl-i marazında fevtinden iki gün mukaddem ber-vech-i muharrer bana lâzımü’l-edâ deyni olduğunu mahzar-ı Müslimîn’de ikrâr ve işhâd dahi edip kable’l-edâ fevt olmağla hâlâ terekesinden taleb ederim suâl olunsun dedikde gıbbe’s-suâl ve’l-inkâr müdde‘î-i mezbûrdan müdde‘âsına beyyine taleb olundukda udûl-ı ahrâr-ı ricâl-i Müslimînden mahmiye-i mezbûrede Kürkçübaşı mahallesinden Ahmed Ağa b. Abdi ve Harrât Kemâl mahallesinden İsmail Beşe b. Mustafa li-ecli’ş-şehâde meclis-i ma‘kūd-ı mezbûra hâzırân olup isre’l-istişhâd fi’l-vâki‘ müteveffâ-yı mezbûr el-Hâc Beşir b. Abdullah b. Abdullah işbu müdde‘î-i mezbûr Çelebi Mehmed Ağa’ya cihet-i karzdan zimmetimde lâzımü’l-edâ dört yüz yetmiş sekiz guruş deyni olduğunu hâl-i marazında fevtinden iki gün mukaddem huzûrumuzda ikrâr ve bizi işhâd eyledi, biz bu husûsa bu vech üzere şâhidleriz şehâdet dahi ederiz deyü her biri edâ-i şehâdet-i şer‘iyye edip ba‘de’t-ta‘dîl ve’t-tezkiye şehâdetleri makbûle olmağın gıbbe’t-tahlîfi’ş-şer‘î <> mûcebiyle ba‘de’l-hükm mûmâ-ileyh Çelebi Mehmed Ağa meclis-i ma‘kūd-ı mezbûrda emîn-i mezbûr mahzarında i‘âde-i kelâm edip ânifen edâsına tenbîh olunan meblağ-ı mezbûr dört yüz yetmiş sekiz guruşu müteveffâ-yı mezbûrun terekesinden olmak üzere bana tamâmen def‘ ü teslîm ben dahi yedinden alıp kabz eyledim dedikde gıbbe’t-tasdîkı’ş-şer‘î vâki‘ hâli mevlânâ-yı mezbûr mahallinde ketb ü tahrîr ba‘dehû ma‘an mürsel Mehmed b. Mustafa ve Hasan b. Abdullah ile meclis-i şer‘a gelip vukū‘u üzere inhâ ve takrîr etmeğin mâ-vaka‘a kayd şüd. Fî 2 min-Rebî‘ülâhir sene 1110. Şuhûdü’l-hâl: Ebubekir Ağa b. Mehmed, Ahmed Ağa b. Nasuh, Mehmed Efendi b. Mustafa, Mustafa Beşe b. Mehmed, İbrahim Çelebi b. Abdullah