Kısmet-i Askeriye Mahkemesi 19 Numaralı Sicil (H. 1109-1110 / M. 1698-1699) cilt: 58, sayfa: 632 Hüküm no: 495 Orijinal metin no: [117a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Süleyman b. Ahmed’in vefat eden Mehmed Ağa’da alacağı olduğu Husûs-ı âti’l-beyânın mahallinde istimâ‘ ve tahrîri iltimâs olunmağın kıbel-i şer‘-i enverden me’zûnen irsâl olunan Mevlânâ Ali Rıfkı Efendi b. el-Hâc Yusuf mahmiye-i İstanbul’da Bezzâz-ı cedîd mahallesinde sâkin iken bundan akdem vefât eden Surre Emîni el-Hâc Mehmed Ağa b. Şa‘bân b. Abdurrahman’ın menziline varıp zeyl-i rakīmde muharrerü’l-esâmî Müslimîn huzûrlarında akd-i meclis-i şer‘-i şerîf ettikde Mahmiye-i mezbûrede Suluhan demekle ma‘rûf handa sâkin bâ‘isü’l-kitâb el-Hâc Süleyman b. Ahmed meclis-i ma‘kūd-ı mezbûrda müteveffâ-yı mezbûrun evlâd-ı sıgārı Ahmed Çelebi ve İsmail ve Âişe’nin tesviye-i emrlerine kıbel-i şer‘den mansûbe vasiyeleri Rukiye Hatun bt. Abdullah mahzarında üzerine da‘vâ ve takrîr-i kelâm edip müteveffâ-yı mezbûr el-Hâc Mehmed Ağa b. Şa‘bân b. Abdurrahman zimmetinde cihet-i karz-ı şer‘îden on yedi bin yüz akçe hakkım olup hattâ müteveffâ-yı mezbûr hâl-i kemâl-i sıhhatinden meblağ-ı mezbûr cihet-i mezbûreden zimmetinde bana deyni olduğunu huzûr-ı Müslimînde ikrâr ve işhâd dahi edip meblağ-ı mezbûru kable’l-edâ fevt olmağla terekesinden taleb ederim suâl olunsun dedikde gıbbe’s-suâl ve’l-inkâr müdde‘î-i mezbûr el-Hâc Süleyman’dan müdde‘âsına beyyine taleb olundukda udûl-ı Müslimînden mahalle-i mezbûre ahâlîsinden el-Hâc Mehmed Ağa b. Abdülbaki ve el-Hâc Mustafa b. İbrahim li-ecli’ş-şehâde meclis-i ma‘kūd-ı mezbûra hâzırân olup isre’l-istişhâd fi’l-hakīka müteveffâ-yı mezbûr el-Hâc Mehmed Ağa b. Şa‘bân b. Abdurrahman hâl-i kemâl-i sıhhatinde müdde‘î-i mezbûr el-Hâc Süleyman’a cihet-i mezbûreden on yedi bin yüz akçe deyni olduğunu huzûrumuzda ikrâr ve bizi işhâd eyledi, biz bu husûsa bu vech üzere şâhidleriz şehâdet dahi ederiz deyü her biri edâ-i şehâdet-i şer‘iyye ettikde ba‘de ri‘âyeti şerâiti’l-kabûl şehâdetleri makbûle olmağın gıbbe’t-tahlîfi’ş-şer‘î mûcebiyle ba‘de’l-hükm vâki‘ hâli mevlânâ-yı mezbûr mahallinde tahrîr ba‘dehû ma‘an irsâl olunan Nasuh b. Yusuf ve İbrahim Çelebi b. Mehmed ile meclis-i şer‘a gelip inhâ ve takrîr etmeğin kayd şüd. Fî gurre-i Cumâdelûlâ sene 1110. Şuhûdü’l-hâl: Umdetü erbâbi’t-tahrîr Hâfız Mehmed Efendi, Mehmed Ağa b. Şa‘bân, el-Hâc Ahmed b. Abdullah, el-Hâc Mustafa b. İbrahim, İbrahim Çelebi b. Mehmed, Nasuh Beşe b. Abdullah