Bab Mahkemesi 54 Numaralı Sicil (H. 1102 / M. 1691) cilt: 20, sayfa: 51 Hüküm no: 3 Orijinal metin no: [1a-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Şemon v. Maneş’in üzerindeki emânet parayı eski Musul valisi Ömer Paşa’nın vekiline vermesi Sâbıkan medîne-i Musul vâlisi olan emîrü’l-ümerâ’i’l-kirâm Ömer Paşa b. Mehmed tarafından husûs-ı âti’l-beyânı ikrâra vekîl olduğu fahrü’l-akrân İbrahim Çavuş b. Abdullah ve Mehmed Bey b. Mustafa şehâdetleriyle şer‘an sâbit olan Hasan Ağa b. Abdurrahman nâm kimesne meclis-i şer‘-i şerîf-i enverde, medîne-i mezbûreye tâbi‘ Çikaf nâm karye sükkânından işbu bâ‘isü’s-sifr Şimon v. Kaşgodoş nâm zimmî muvâcehesinde bi’l-vekâle ikrâr ve takrîr-i kelâm edip, müvekkilim mûmâ-ileyh hazretleri merkūm Şimon’a târih-i kitâbdan iki ay mukaddem iki yüz guruş olmak üzre otuz bin mangırını emânet vaz‘ ve teslîm, merkūm Şimon dahi ber vech-i muharrer ahz u kabz etmişdi. El-hâletü hâzihî zikr olunan otuz bin mangırı mezbûr Şimon yine müvekkilim mûmâ-ileyhe bi’t-tamâm teslîm, ol dahi kabz ve tesellüm edip mezkûr Şimon zimmetinde sâlifü’l-beyân mangırdan bir akçe ve bir habbe bâkī kalmamışdır dedikde, gıbbe’t-tasdîki’l-mu‘teberi’ş-şer‘î mâ hüve’l-vâki‘ bi’t-taleb ketb olundu. Fi’l-yevmi’s-sânî ve’l-ışrîn min Cemâziyelevvel li sene isneteyn ve mi’e ve elf. Şuhûdü’l-hâl: Molla Osman b. Ahmed, Arslan Bey b. Hüdaverdi, İbrahim Çavuş b. Abdullah, Mehmed Bey b. Mustafa, İbrahim Çelebi b. Ahmed.