Bab Mahkemesi 54 Numaralı Sicil (H. 1102 / M. 1691) cilt: 20, sayfa: 52 Hüküm no: 4 Orijinal metin no: [1a-3] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. İbrahim’in maraz-ı mevtinde Molla Kırımî Vakfı’na ait attar dükkânının tasarruf hakkını karısına terketmesinin geçersiz olduğu Mahmiye-i İstanbul’da Molla Kırımî Vakfı’na bi’l-fi‘il mütevellî olan bâ‘isü hâze’l-kitâb Yahya Çelebi b. Osman nâm kimesne meclis-i şer‘-i şerîf-i enverde, Molla Kırımî mahallesinde sâkin iken vefât eden İbrahim nâm kimesnenin zevcesi ve zât mu‘arrefe olan Havva bt. Abdullah nâm hâtun mahzarında bi’t-tevliye üzerine da‘vâ ve takrîr-i kelâm edip, vakf-ı mezbûrdan olup mahalle-i mezbûrede vâki‘ lede’l-cîrân ma‘lûmü’l-hudûd bir bâb attâr dükkânı icâreteyn-i ma‘lûmeteyn ile müteveffâ-yı mezbûrun tasarrufunda olup, müteveffâ-yı mezbûr hayâtında zikr olunan dükkânın hakk-ı tasarrufunu benim iznim ile zevcesi merkūme Havva’ya ferâğ ve kasr-ı yed etmekle, merkūme Havva’ya imzâ ve hatmi hâvî temessük dahi vermişdim. Hâlâ mezbûr İbrahim fevt olup, ferâğ-ı mezbûr maraz-ı mevtinden olmağla, yedimde olan fetvâ-yı şerîfe mûcebince dükkân-ı mezkûru mezbûre Havva’dan ahz ve âhara îcâr murâd eyledim, suâl olunup dükkân-ı mezkûrdan kasr-ı yed ve bana teslîme tenbîh olunmak matlûbumdur dedikde, gıbbe’s-suâl mezbûre Havva cevâbında, fi’l-hakīka kaziyye minvâl-i meşrûh üzre olup, ferâğ-ı mezkûr müteveffâ-yı mezbûrun maraz-ı mevtinde olduğunu ikrâr ve i‘tirâf etmeğin, mûcebince dükkân-ı mezkûrdan kasr-ı yed ve mütevellî-i mezbûre teslîme mesfûr Havva Hâtun’a tenbîh olunmağın, mâ vaka‘a bi’t-taleb ketb olundu. Fi’s-sâmin aşer min Cumâdelâhire li sene isneteyn ve ve mi’e ve elf. Şuhûdü’l-hâl: İbrahim Çelebi b. Ahmed, Mehmed Efendi b. Mehmed Efendi, Mehmed Çelebi b. ( ), İbrahim Çelebi b. Ahmed ve gayruhüm.