Kısmet-i Askeriye Mahkemesi 19 Numaralı Sicil (H. 1109-1110 / M. 1698-1699) cilt: 58, sayfa: 635 Hüküm no: 498 Orijinal metin no: [117b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Elçi Perviz’in ölmüş olan Karabet’te alacağı olduğu Mahmiye-i İstanbul’da Balatkapısı dâhilinde sâkin olup Argun Cemâ‘ati’nden Elçi Perviz v. İsak nâm Yahûdi mahfil-i kazâda Şeyh Ferhad mahallesinde sâkin iken bundan akdem hâlik olan Karabet v. Sakar’ın tesviye-i umûruna kıbel-i şer‘den mansûb vasîsi olan mahalle-i mezbûre sâkinlerinden Bali v. Yorgaki nâm zimmî muvâcehesinde üzerine da‘vâ ve takrîr-i kelâm edip hâlik-i merkūm Karabet v. Sakar’ın hat ve hatmini hâvî işbu yedimde olan deyn temessükü nâtık olduğu üzere beynimizde ilm-i şer‘î ile ma‘lûm yedimden iştirâ ve kabz eylediği londura çuka semeninden üç yüz otuz iki guruş hakkım olup meblağ-ı mezbûrun elli guruşunu hayâtında bana def‘ ü teslîm edip hattâ helâkinden iki ay mukaddem cihet-i mezbûreden zimmetinde reddi vâcib bana ol kadar guruş deyni olduğunu alâ-ruûsi’ş-şehâde ikrâr ve işhâd dahi etmişdir, suâl olunsun dedikde gıbbe’s-suâl ve’l-inkâr müdde‘î-i mersûmdan müdde‘âsına beyyine taleb olundukda tâife-i zimmiyânın ma‘kūllerinden mahalle-i mezbûrede sâkin Şahin v. Kosta ve Mayor Cemâ‘ati’nden olup medîne-i Üsküdar’da Öküz Limanı kurbünde sâkin Arslan v. Matatiye nâm kimesne li-ecli’ş-şehâde meclis-i şer‘a hâzırân olup isre’l-istişhâd fi’l-hakīka hâlik-i mezbûr Karabet helâkinden iki ay mukaddem işbu müdde‘î-i mezbûr Elçi Perviz v. İsak nâm Yahûdinin yedinde olan deyn temessükü nâtık olduğu üzere londura çuka semeninden üç yüz otuz iki guruş müdde‘î-i merkūma zimmetinde reddi vâcib deynim vardır deyü huzûrumuzda ikrâr ve bizi işhâd eyledi, biz bu husûsa bu vech üzere şâhidleriz şehâdet dahi ederiz deyü her biri edâ-i şehâdet-i şer‘iyye ettiklerinde ba‘de’t-ta‘dîl ve’t-tezkiye şehâdetleri makbûle olmağın gıbbe’t-tahlîfi’ş-şer‘î mûcebiyle ba‘de’l-hükm mâ-vaka‘a kayd şüd. Fî 12 Cumâdelûlâ sene 1110. Şuhûdü’l-hâl: el-Hâc Mehmed b. Sunullah, İbrahim Çelebi b. Mehmed, İmâmzâde Mehmed Efendi, Hâfız Mehmed Efendi