Kısmet-i Askeriye Mahkemesi 19 Numaralı Sicil (H. 1109-1110 / M. 1698-1699) cilt: 58, sayfa: 634 Hüküm no: 497 Orijinal metin no: [117b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Uzun Ahmed Ağa’nın vefat eden Sarraf Abdullah’daki alacağını terekeden tahsil ettiği Husûs-ı âti’l-beyânın mahallinde istimâ‘ ve tahrîri iltimâs olmağın savb-ı şer‘den me’zûnen irsâl olunan İmâmzâde Mehmed Efendi b. Ahmed Efendi mahmiye-i İstanbul’da Süleymaniye Câmi‘-i şerîfi kurbünde beytülmâl emîni olanlara mahsûs odaya varıp zeyl-i kitâbda muharrerü’l-esâmî Müslimîn huzûrlarında akd-i meclis-i şer‘-i kavîm eyledikde dergâh-ı âlî yeniçerilerinden Demri? taraflarından olup mahmiye-i mezbûrede Tülbentci Hüsam mahallesinde sâkin iken bundan akdem vefât eden Sarrâf el-Hâc Neşrî? Abdullah b. Abdullah’ın zâhirde vâris-i ma‘rûfu olmamağla mecmû‘-ı terekesi cânib-i beytülmâle âid olduğu şer‘an zâhir ve mütehakkık oldukdan sonra mahmiye-i mezbûrede Kumkapı kurbünde Kürkçübaşı mahallesinde sâkin işbu râfi‘ü’l-kitâb Uzun Ahmed Ağa b. Abdi meclis-i ma‘kūd-ı mezbûrda mahmiye-i mezbûrede yeniçeri beytülmâl emîni olmağla tereke-i müteveffâ-yı mezbûra vâzı‘u’l-yed olup husûs-ı âti’z-zikrde husûmet ve redd-i cevâba kıbel-i şer‘den me’zûn olan fahrü’l-akrân el-Hâc Hüseyin b. Muslu mahzarında üzerine da‘vâ ve takrîr-i kelâm edip müteveffâ-yı mezbûr el-Hâc Neşrî? Abdullah b. Abdullah zimmetinde cihet-i mezbûrdan beş yüz guruş hakkım olup hattâ müteveffâ-yı mezbûr hâl-i marazında fevtinden iki gün mukaddem mahzar-ı Müslimînde ikrâr ve işhâd eyledikden sonra meblağ-ı mezbûru kable’l-edâ fevt olmağla terekesinden taleb ederim suâl olunsun dedikde gıbbe’s-suâl ve’l-inkâr müdde‘î-i mezbûrdan müdde‘âsına beyyine taleb olundukda udûl-ı ahrâr-ı ricâl-i Müslimînden mahmiye-i mezbûrede Soğan Ağa mahallesinden Ömer Ağa b. Abdullah ve Tülbentci Hüsam mahallesinden İsmail Ağa b. Mustafa li-ecli’ş-şehâde meclis-i ma‘kūd-ı mezbûra hâzırân olup isre’l-istişhâd fi’l-vâki‘ müteveffâ-yı mezbûr el-Hâc Neşrî? Abdullah b. Abdullah işbu müdde‘î-i mezbûra cihet-i mezbûrdan zimmetinde beş yüz guruş deyni olduğunu huzûrumuzda ikrâr ve bizi işhâd eyledi biz bu husûsa bu vech üzere şâhidleriz şehâdet dahi ederiz deyü her biri edâ-i şehâdet-i şer‘iyye edip ba‘de’t-ta‘dîl ve’t-tezkiye şehâdetleri makbûle olmağın gıbbe’t-tahlîf mûcebiyle ba‘de’l-hükm mezbûr Ahmed Ağa meclis-i ma‘kūd-ı mezbûrda emîn-i mezbûr mahzarında ikrâr ve takrîr-i kelâm edip ânifen edâsına tenbîh olunan meblağ-ı mezbûr beş yüz guruşu emîn-i mezbûr yedinden tamâmen ahz u kabz eyledim dedikde gıbbe’t-tasdîkı’ş-şer‘î vâki‘ hâli mevlânâ-yı mezbûr mahallinde ketb ü tahrîr ba‘dehû ma‘an mürsel Mehmed Çelebi b. Mustafa ve Hasan b. Abdullah ile meclis-i şer‘a gelip vukū‘u üzere inhâ ve takrîr etmeğin mâ-vaka‘a kayd şüd. Fî 29 min-Rebî‘ülâhir sene 1110. Şuhûdü’l-hâl: Süleyman Ağa b. Mustafa, Hamza Beşe b. Mehmed, İsmail Efendi b. Ömer, İbrahim Çelebi b. Ahmed, Mehmed Çavuş b. Abdullah