Kısmet-i Askeriye Mahkemesi 19 Numaralı Sicil (H. 1109-1110 / M. 1698-1699) cilt: 58, sayfa: 637 Hüküm no: 500 Orijinal metin no: [118a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. İbrahim Ağa’nın vefatından önce küçük oğlu Osman’ın vesayetini eşi Afife’ye verdiği Husûs-ı âti’l-beyânın mahallinde istimâ‘ ve tahrîri iltimâs olunmağın kıbel-i şer‘-i enverden me’zûnen irsâl olunan Abdurrahman Efendi b. el-merhûm Ahmed Efendi mahmiye-i İstanbul’da Uzun Yusuf mahallesi ahâlîsinden olup bu sene-i mübârekede hacc-ı şerîfden gelirken Tebük? nâm mevzi‘de vefât eden el-Hâc İbrahim Ağa b. Hasan b. Abdullah’ın menziline varıp zeyl-i kitâbda mastûrü’l-esâmî Müslimîn huzûrlarında akd-i meclis-i şer‘-i şerîf ettikde müteveffâ-yı mezbûrun verâseti zevce-i menkûha-i metrûkesi Afife Hatun bt. Ahmed Efendi ile kebîr oğlu Mehmed Çelebi’ye ve sagīr oğlu Osman’a münhasıra oldukdan sonra sagīr-i mezbûrun vech-i âtî üzere vasiyy-i muhtâresi olduğunu iddi‘â edip zâtı ta‘rîf-i şer‘î ile mu‘arrefe olan sagīr-i mezbûrun vâlidesi hâfızatü’l-kitâb Afife Hatun bt. Ahmed Efendi meclis-i ma‘kūd-ı mezbûrda terekesine vaz‘-ı yed eden kebîr oğlu Mehmed Çelebi mahzarında üzerine da‘vâ ve takrîr-i kelâm edip sagīr-i mezbûrun babası zevcim müteveffâ-yı mezbûr el-Hâc İbrahim Efendi b. Hasan b. Abdullah bu sene-i mübârekede hacc-ı şerîfden gelirken Tebük? nâm mevzi‘de hasta ve alîl oldukda bi-emrillâhi te‘âlâ eğer fevt olursam mahalle-i mezbûrede sâkine zevce-i menkûham Afife Hatun’u firâşından mütevellid sagīr oğlum Osman’ın tesviye-i umûruna ve mal-ı müntakilini vakt-i rüşd ü sedâdına varınca zabt u hıfza kabûlüme mevkūfe vesâyet ile beni vasiye-i muhtâre huzûr-ı Müslimînde nasb edip musırran fevt olup ben dahi haber-i vesâyet bana bâliğ oldukda vesâyet-i mezbûreyi kabûl edip mal-ı müntakil-i sagīri müstakılleten ahz u kabz ve hıfz murâd ettiğimde mezbûr Mehmed Çelebi mâni‘ olur suâl olunsun dedikde gıbbe’s-suâl ve’l-inkâr müdde‘iye-i mezkûreden sıdk-ı makāline beyyine taleb olundukda udûl-ı Müslimînden mevzi‘-i mezkûrda yanında bulunup mahmiye-i mezkûrede Silivrikapısı kurbünde İbrahim Paşa mahallesinde sâkin el-Hâc Ali Ağa b. Mehmed ve zikr olunan Uzun Yusuf mahallesinde sâkin el-Hâc Mehmed Ağa b. Mustafa nâm kimesneler li-ecli’ş-şehâde meclis-i ma‘kūd-ı mezbûra hâzırân olup isre’l-istişhâd fi’l-hakīka müteveffâ-yı mezbûr İbrahim Ağa b. Hüseyin b. Abdullah mevzi‘-i mezkûrda hasta ve alîl oldukda bi-emrillâhi te‘âlâ vefât edersem sagīr-i mezbûrun vâlidesi ve firâşından mütevellid oğlum Osman’ın tesviye-i umûruna ve mal-ı müntakilini vakt-i rüşd ü sedâdına varınca zabt ve hıfza kabûlüne mevkūfe vesâyet ile zevcesi mezbûre Afife Hatun’u huzûrumuzda vasiyy-i muhtâre nasb edip musırran fevt oldukda haber-i mezbûreyi mezbûre Afife’ye ifâde ve i‘lâm ettiğimizde ol dahi kabûl ve merâsimini edâya müte‘ahhide oldu, biz bu husûsa bu vech üzere şâhidleriz şehâdet dahi ederiz deyü her biri edâ-i şehâdet-i şer‘iyye ettiklerinde ba‘de’t-ta‘dîl ve’t-tezkiye şehâdetleri makbûle olmağın mûcebiyle ba‘de’l-hükm vâki‘ hâli mevlânâ-yı mezbûr mahallinde ketb ü tahrîr ba‘dehû ma‘an ba‘s olunan İbrahim Çelebi b. Abdullah ve Ahmed b. Ali ile meclis-i şer‘a gelip inhâ ve takrîr etmeğin mâ-vaka‘a kayd şüd. Fî 6 Cumâdelûlâ sene 1110. Şuhûdü’l-hâl: Ahmed Efendi b. Ali, İbrahim Ağa b. Musa, Mustafa Efendi b. Rasûl, Hüseyin Çelebi b. Halil, Abdurrahman Ağa b. (°), Mustafa Çelebi b. Mehmed, Ahmed b. Mehmed ve Subaşı