Kısmet-i Askeriye Mahkemesi 19 Numaralı Sicil (H. 1109-1110 / M. 1698-1699) cilt: 58, sayfa: 638 Hüküm no: 501 Orijinal metin no: [118b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. İkinci Baltacı Hüseyin Bey’in vefatıyla vasiyeti üzerine borcunun ödenip Kur’an-ı Kerim’lerin de vakfedildiği Husûs-ı âti’l-beyânın mahallinde istimâ‘ ve tahrîri iltimâs olunmağın kıbel-i şer‘-i enverden me’zûnen irsâl olunan Mevlânâ Âmidî el-Hâc Abdurrahman Efendi mahmiye-i İstanbul’da Hasbahçe’de Çiğil? odasına varıp zeyl-i kitâbda muharrerü’l-esâmî Müslimîn huzûrunda akd-i meclis-i şer‘-i şerîf ettikde zikr olunan bahçede Solak odasında sâkin olup bundan akdem mahrûse-i Edirne’de müsâfiren vefât eden İkinci Baltacı Hüseyin Bey b. Sinan’ın hizmetinde olan bâ‘isü’l-kitâb İbrahim b. Mustafa meclis-i ma‘kūd-ı mezkûrda müteveffâ-yı mezbûrun li-ebeveyn karındaşı ve hasren vârisi olduğu hüccet-i şer‘iyye ile müsbet olmağın mecmû‘-ı terekesine vaz‘-ı yed eden İbrahim Efendi b. el-mezbûr Sinan mahzarında üzerine da‘vâ ve takrîr-i kelâm edip müteveffâ-yı mezbûr Hüseyin Bey b. Sinan b. Abdullah zimmetinde cihet-i karzdan beş guruş hakkım olup hattâ müteveffâ-yı mezbûr hâl-i hayâtında meblağ-ı mezbûru kendi mesârifine sarfla istihlâk edip bana vâcibü’l-edâ cihet-i merkūmeden ol kadar guruş deyni olduğunu huzûr-ı Müslimînde ikrâr ve işhâd edip kable’l-edâ fevt olmağla terekesinden taleb ederim suâl olunsun dedikde ve müteveffâ-yı mezbûr Hüseyin Bey b. Sinan b. Abdullah fevtinden sonra sülüs-i malından benim içün <> nakid on guruş ile hediyesi on guruş kıymetli işbu mülküm olan Mushaf-ı şerîf hizmetkârım mezbûr İbrahim’e verile deyü huzûr-ı Müslimînde vasiyet ve ikrâr ve musırran-aleyh fevt oldukda sülüs-i malı meblağ-ı mezbûr ve zikr olunan Mushaf-ı şerîf kıymetine müsâ‘id olmağla taleb eylediğimde bana teslîmden imtinâ‘ [eder] suâl olunsun dedikde ve zikr olunan Solak odasında sâkin Hasan Bölükbaşı b. Bayram meclis-i ma‘kūd-ı mezbûrda mezbûr İbrahim Efendi mahzarında üzerine da‘vâ ve takrîr-i kelâm edip müteveffâ-yı mezbûr Hüseyin Bey b. Sinan b. Abdullah hayâtında bi-emrillâhi te‘âlâ fevt olduğumda hediyesi on guruş kıymetli işbu yedimde mülküm olan Mushaf-ı şerîf ve mukīm olup her kim Solak odasında sâkin olursa kırâetine kādir kimesne kırâet ede deyü vasiyet ve ikrâr edip musırran-aleyh fevt olmağla sülüs-i malı meblağ-ı mezbûra müsâ‘id olmağla terekesinden taleb ederim suâl olunsun dedikde gıbbe’s-suâl ve’l-inkâr müdde‘î-i mezbûrdan sıdk-ı makāllerine beyyine taleb olundukda udûl-ı Müslimînden Hadîka-i hâssa-i şehriyârîde sâkin Abdullah Çavuş b. Ahmed ve Uzun Ali b. Ahmed li-ecli’ş-şehâde meclis-i ma‘kūd-ı mezbûra hâzırân olup isre’l-istişhâd fi’l-hakīka müteveffâ-yı mezbûr Hüseyin Bey b. Sinan b. Abdullah hâl-i hayâtında müdde‘î-i mezbûr İbrahim b. Mustafa’ya cihet-i karzdan zimmetinde vâcibü’l-edâ beş guruş deynim vardır, fevtimden sonra on guruş hediyesi olan Mushaf-ı şerîfim sülüsümden vakf ola ve sülüsümden on guruş hizmetkârım mezbûr İbrahim’e verile ve mezbûr Hasan Bölükbaşı’ya kezâlik on guruş hediyesi Mushaf-ı şerîfim Solak odasına vakfım olup teslîm oluna deyü huzûrumuzda vasiyet ve ikrâr ve musırran-aleyh vefât ettikde sülüs-i malı meblağ-ı mezbûra ve Mushaf-ı şerîfler hediyelerine müsâ‘iddir, biz bu husûsa bu vech üzere şâhidleriz şehâdet dahi ederiz deyü her biri edâ-i şehâdet-i şer‘iyye ettikde ba‘de’t-ta‘dîl ve’t-tezkiye şehâdetleri makbûle olmağın mûcebince ba‘de’l-hükm müdde‘î-i mezbûr İbrahim meclis-i ma‘kūd-ı mezbûrda mezbûr İbrahim Efendi mahzarında ikrâr ve takrîr-i kelâm edip ânifen edâsına hükmolunan beş guruşu ve on guruş kıymetli Mushaf-ı şerîfi terekeden olmak üzere mezbûr İbrahim Efendi yedinden tamâmen ahz u kabz eyledim min-ba‘d yedinde bir şey kalmadı ve mezbûr Hasan Bölükbaşı dahi meclis-i mezbûrda merkūm İbrahim Efendi mahzarında takrîr-i kelâm edip Solak odasına vakf olan on guruş hediyeli Mushaf-ı şerîfi mezbûr İbrahim Efendi yedinden ahz u kabz eyledim dediklerinde vâki‘ hâli mevlânâ-yı mezbûr mahallinde tahrîr ba‘dehû ma‘an mürsel Hasan Çelebi b. Abdullah ve Mehmed b. Ahmed ile meclis-i şer‘a gelip takrîr etmeğin mâ-vaka‘a kayd şüd. Fî 5 Cumâdelûlâ sene 1110. Şuhûdü’l-hâl: Mehmed Efendi b. Ali, İbrahim Efendi b. Hüseyin, Mehmed Halîfe b. Mustafa, Osman Bey b. Süleyman