Kısmet-i Askeriye Mahkemesi 19 Numaralı Sicil (H. 1109-1110 / M. 1698-1699) cilt: 58, sayfa: 640 Hüküm no: 502 Orijinal metin no: [118b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Vefat eden Şaban Kethüda’nın hanımı Saraylı Belkıs’ın terekeden bir şey saklamadığı Husûs-ı âti’l-beyânın mahallinde istimâ‘ ve tahrîri iltimâs olunmağın savb-ı şer‘-i enverden me’zûnen irsâl olunan İmâmzâde Mevlânâ Mehmed Efendi b. Ahmed Efendi Dârü’l-hilâfeti’l-aliyye Kostantıniyyetü’l-mahmiye mahallâtından Saraçhane kurbünde Mimârayas mahallesi ahâlîsinden olup tarîk-i hacc-ı şerîfde vefât eden Şa‘bân Kethüdâ b. Abdi’nin menziline varıp zeyl-i kitâbda muharrerü’l-esâmî Müslimîn huzûrunda akd-i meclis-i hatîr eyledikde, müteveffâ-yı mezbûrun verâseti zevce-i menkûha-i metrûkesi Saraylı Belkıs bt. Abdullah ile vâlidesi Şerife Hatun bt. Ahmed’in li-ebeveyn er karındaşı Karaca’nın oğlu olup Mekke-i mükerremede -şerrefehallâhu- sâkin el-Hâc Musa’ya münhasıra olduğu şer‘an zâhir oldukdan sonra müteveffâ-yı mezbûrun sülüs-i malını vücûh-ı birre ve hayra sarfa ve mâ‘adâ terekesini vârisi mezbûr el-Hâc Musa’ya îsâle vasiyy-i muhtârı olan fahrü’l-akrân Küçük Sakābaşı el-Hâc Süleyman Ağa b. Mehmed meclis-i ma‘kūd-ı mezkûrda müteveffâ-yı mezbûrun zevcesi olmağla terekesine vâzı‘atü’l-yed olup zâtı el-Hâc Mustafa b. Abdurrahman ve diğer el-Hâc Mustafa b. Ahmed ta‘rîfleriyle mu‘arrefe olan işbu sâhibetü’l-kitâb mezbûr Saraylı Belkıs Hatun mahzarında bi’l-vesâye üzerine da‘vâ ve takrîr-i kelâm edip işbu mezbûr Saraylı Belkıs Hatun müteveffâ-yı mezbûrun terekesinden hâric ez-defter-i kassâm-ı askerî beş yüz nukūd guruş ile mecmû‘u yüz guruş kıymetli üç yorgan ve iki minder ve beş yasdık ve bir döşek ve bir samur paçası kürk ve bir nâfe kürkünü ketm ü ihfâ ve mîrâsa idhâlden imtinâ‘ eder suâl olunsun dedikde gıbbe’s-suâl ve’l-inkâr müdde‘î-i mezbûrdan sıdk-ı makāline beyyine taleb olundukda ityân-ı beyyineden ızhâr-ı acz ile istihlâf etmeğin zikr olunan beş yüz guruş ile eşyâ-i mezkûreyi ketm ü ihfâ etmeyip ve üzerine red ve zamân lâzım olmadığına mezbûre Saraylı Belkıs Hatun’a yemîn teklîf olundukda ol dahi alâ-vefki’l-mesûl yemîn billâhi’l-aliyyi’l-a‘lâ etmeğin mûcebiyle müdde‘î-i merkūm husûs-ı mezbûra müte‘allık mezbûre Saraylı Belkıs Hatun ile bilâ-beyyine mu‘ârazadan men‘ birle vâki‘ hâli mevlânâ-yı mezbûr mahallinde tahrîr ba‘dehû ma‘an ba‘s olunan Çukadâr el-Hâc Süleyman b. Abdullah ve Hasan Çelebi b. Abdullah meclis-i şer‘de inhâ etmeğin mâ-vaka‘a kayd şüd. Fî 5 Cumâdelûlâ sene 1110. Şuhûdü’l-hâl: İbrahim Efendi b. Mehmed, Hüseyin Ağa b. Ali, el-Hâc Ali b. Nasuh, İbrahim Bey b. Şa‘bân