Kısmet-i Askeriye Mahkemesi 19 Numaralı Sicil (H. 1109-1110 / M. 1698-1699) cilt: 58, sayfa: 642 Hüküm no: 504 Orijinal metin no: [119a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Borçları mallarından fazla olarak vefat eden Mehmed Çelebi’nin evinin borçlarının ödenmesi için satıldığı Mahmiye-i İstanbul’da Şeyh Ferhad mahallesinde sâkin iken düyûnu terekesinden ezyed olduğu halde vefât eden es-Seyyid Mehmed Çelebi b. es-Seyyid Ali’nin sulbî sagīr oğlu es-Seyyid Ahmed ve sagīre kızı Şerife Fâtıma’nın vasiyy-i mansûbu olup el-Hâc Beşirî mahallesinde sâkin Hasan Beşe b. Receb ve âhar sagīr oğulları es-Seyyid Abdullah ve es-Seyyid Mustafa’nın kezâlik vasiyy-i mansûbları el-Hâc Yusuf b. Ali mahfil-i kazâda zikr olunan Şeyh Ferhad mahallesi ahâlîsinden Salih Ağa b. Mehmed b. Abdurrahman tarafından husûs-ı âti’l-beyânda vekîl olduğu yine Şeyh Ferhad mahallesi sükkânından Hasan Ağa b. İsmail ve Hüseyin Çelebi b. Hasan şehâdetleriyle mahzar-ı hasm-ı câhidde sâbit ve sübût-ı vekâletine hükm-i şer‘î lâhık olan bâ‘isü’l-kitâb Mustafa Çelebi b. Ömer muvâcehesinde her biri bi’l-vesâye ikrâr ve takrîr-i kelâm edip müteveffâ-yı mezbûr es-Seyyid Mehmed Çelebi’nin ile’l-vefât mülk ve hakkı olduğu müsbet olup zikr olunan Şeyh Ferhad mahallesinde vâki‘ bir tarafdan Saraç İbrahim Çelebi mülkü ve bir tarafdan Papazoğlu kadîmî mülkü ve bir tarafdan Abdulkadir Ağa mülkü ve bir tarafdan tarîk-i âmma müntehî fevkānî iki bâb oda ve bir sofa ve bir bahçe ve bi’r-i mâ ve kenîfi müştemil mülk menzilin müteveffâ-yı mezbûrun düyûnu müsbetesi’çün bey‘i lâzım gelmekle münâdîlerden Mahmud Çelebi b. Hasan nâm münâdî yediyle sûk-ı sultânîde ve mecma‘-ı nâs olan mevâzi‘-i adîdede yüz gün mikdârı nidâ ve müzâyede olunup rağabât-ı nâs bi’l-külliye münkatı‘a oldukdan sonra müvekkil-i mezbûr Salih Ağa üzerine iki yüz seksen guruşa karâr edip ziyâde ile tâlib-i âharı zuhûr eylemediğinden mâ‘adâ meblağ-ı mezbûr yevm-i akidde menzil-i mezbûrun sümünü misli olduğu zeyl-i vesîkada muharrerü’l-esâmî Müslimîn haberleriyle lede’ş-şer‘i’ş-şerîf zâhir ve mukarrer olmağın menzil-i mezbûru bi-cümleti’t-tevâbi‘ ve’l-levâhık tarafeynden îcâb ve kabûlü hâvî şurût-ı müfsideden ârî bey‘-i bâtt-ı sahîh-i şer‘î ile bi’l-izni’ş-şer‘î meblağ-ı mezbûr iki yüz guruş mukābelesinde vekîl-i mezbûr Mustafa Çelebi’ye bey‘ ve teslîm ol dahi müvekkilinin malı ile müvekkili içün iştirâ ve tesellüm ve kabûl edip semeni olan meblağ-ı mezbûru vekîl-i mezbûr yedinden tamâmen alıp kabz eyledik ba‘de’l-yevm menzil-i mahdûd-ı mezbûr, merkūm Salih Ağa’nın mülk-i müşterâsıdır, keyfe mâ yeşâ mutasarrıf olsun dediklerinde gıbbe’t-tasdîk mâ-vaka‘a kayd şüd. Fî 13 Cumâdelûlâ sene 1110. Şuhûdü’l-hâl: Hüseyin Efendi b. Hasan imâm, Mehmed Çelebi b. Abdülfettah, Abdurrahman Efendi b. Mehmed, İsmail Efendi b. Mehmed, Ali Efendi b. Yusuf