Kısmet-i Askeriye Mahkemesi 19 Numaralı Sicil (H. 1109-1110 / M. 1698-1699) cilt: 58, sayfa: 650 Hüküm no: 510 Orijinal metin no: [120b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Hüseyin Odabaşı’nın Yazıcı Hasan Beşe’den kalan malları Mehmed Efendi’den aldığı Mahmiye-i İstanbul’da Tarsus mahallesinde Mimâr Kâtibi Mehmed Efendi b. Ali menzilinde müsâfiren sâkin iken bundan akdem vefât eden Yazıcı Hasan Beşe b. Kara Ahmed b. Mustafa ve anasının li-ebeveyn ammi oğlu ve usûbet-i nesebiye cihetinden hasren vârisi olduğu bedîd olan hâkim hücceti mûcebince şer‘an sâbit ve mütebeyyin olan Hüseyin Odabaşı b. Salih b. Mustafa meclis-i şer‘de râfi‘ü’l-kitâb mezbûr Mehmed Efendi mahzarında ikrâr ve takrîr-i kelâm edip mûrisim müteveffâ-yı mezbûr Hasan Beşe ber-vech-i muharrer merkūm Mehmed Efendi’nin menzilinde fevt olmağla ba‘zı eşyâ-i ma‘lûmesi yedinde kalmışdı, hâlâ mezbûr Mehmed Efendi muhallefât-ı mezbûru ve cihet-i karzdan müteveffâ-yı mezbûra zimmetinde deyni olan doksan beş guruşu bi’t-tamâm bana edâ ve teslîm ben dahi verâsetim hasebiyle yedinden ahz u kabz ettim min-ba‘d cemî‘ muhallefât-ı mezbûreden ve meblağ-ı mezbûr doksan beş guruşdan merkūm Mehmed Efendi’nin yedinde bir akçe ve bir habbe hakkım bâkī kalmamağla müteveffâ-yı mezbûrun kalîl ü kesîr bi’l-cümle ismi mal ıtlâk olunan terekesine müte‘allıka âmme-i da‘vâdan deynini ibrâ ve ıskāt eyledim dedikde gıbbe’t-tasdîkı’ş-şer‘î mâ-vaka‘a bi’t-taleb ketb şüd. Fî 13 min-Cumâdelûlâ sene 1110. Şuhûdü’l-hâl: Hüseyin Ağa b. Receb, Halil Ağa b. Yusuf, Halil b. Mehmed, Küçük Halil Odabaşı b. Mustafa, Mehmed Halîfe b. İshak