Kısmet-i Askeriye Mahkemesi 19 Numaralı Sicil (H. 1109-1110 / M. 1698-1699) cilt: 58, sayfa: 652 Hüküm no: 512 Orijinal metin no: [121a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Mecnun Râbia’nın malından babası Fazlı’nın elinde bildirdiğinden daha fazla para olmadığı ve Râbia’nın işlerini görmek üzere bir cariye satın alınmasına izin verildiği Mahmiye-i İstanbul’da Hocapaşa Hanı’nda sâkine ve cünûn-ı mutbık ile mecnûne olan Râbia bt. el-Hâc Fazlı’nın kayyım ve vasîsi ve li-ebeveyn ammi oğlu İbrahim Ağa b. el-Hâc Receb meclis-i şer‘de mecnûne-i mezbûrenin babası bâ‘isü’l-kitâb merkūm el-Hâc Fazlı mahzarında üzerine da‘vâ ve takrîr-i kelâm edip mahmiye-i mezbûrede zevci olup bundan akdem vefât eden el-Hâc Ahmed’in terekesinden isâbet eden dokuz yüz guruş ve mehr-i müecceli olan yetmiş beş guruş mezbûr yetmiş beş guruşluk yetmiş yaldız altınını ve fevt olan kızı Âişe’nin terekesinden isâbet eden iki bin beş yüz guruş ve vâlidesi olup bundan esbak fevt olan Bahtiyar’ın terekesinden isâbet eden beş bin guruş ki min-haysü’l-mecmû‘ sekiz bin beş yüz yetmiş beş guruş hakkını babası ve velîsi olmağla mezbûr el-Hâc Fazlı ahz u kabz etmişdir, hâlâ suâl olunup takrîri tahrîr olunmak matlûbumdur dedikde gıbbe’s-suâl mezbûr el-Hâc Fazlı cevâbında kızı mecnûne-i mezbûreye zevci müteveffâ-yı mezbûr el-Hâc Ahmed’den ve mehr-i müeccelinden ve fevt olan kızı Âişe’den ve vâlidesi mezbûre Bahtiyar’dan isâbet eden hakkından ancak bin iki yüz yirmi buçuk guruş hakkı bi’l-velâye ahz u kabz ve malına halt eylediği ve mâ‘adâyı inkâr edicek müdde‘î-i mezbûrdan ziyâdeye beyyine taleb olundukda ityân-ı beyyineden ızhâr-ı acz ile istihlâf etmeğin fi’l-hakīka mecnûne-i mezbûrenin sekiz bin beş yüz yetmiş beş guruş hakkını kabz eylemeyip ikrârı olan bin iki yüz yirmi buçuk guruşdan mâ‘adâ yedi bin üç yüz elli dört buçuk guruş dahi üzerine redd ü zamân lâzım olmadığına mezbûr el-Hâc Fazlı’ya yemîn teklîf olundukda ol dahi hasebi’l-mesûl yemîn billâhi’l-aliyyi’l-a‘lâ etmeğin bilâ-beyyine bî-vech mu‘ârazadan men‘ olunup mâ-vaka‘a bi’t-taleb ketb olundu. Fî 9 min-Cumâdelûlâ sene 1110. Şuhûdü’l-hâl: Mukayyid Mustafa Efendi b. Mehmed, Abdurrahman Efendi b. Ahmed Efendi, Kethüdâ İbrahim Ağa, el-Hâc Mehmed b. Abdullah Mecnûne-i mezbûrenin babası mezbûr el-Hâc Fazlı üzerine mecnûne-i mezbûrenin li-ebeveyn ammi oğlu İbrahim Ağa b. el-Hâc Receb hasbî kayyım ve vasî nasb olunduğu bu mahalle ba‘de’l-kabûl kayd şüd. Hurrire fi’t-târîhi’l-mezbûr. Şâhidûnü’s-sâbikūn Mecnûne-i mezbûrenin babası mezbûr el-Hâc Fazlı talebiyle mecnûne-i mezbûrenin malında müsâ‘ade olmağla istihdâmı içün semen-i misliyle bir câriye iştirâ olunmağa kıbel-i şer‘den izin olmağla mecnûne-i mezbûre câriyesine târîh-i kitâbdan yevmî otuz akçe nafaka farz ve takdîr olunduğu kayd şüd. Hurrire 9 min-Cumâdelûlâ sene 1110. Şuhûdü’s-sâbikūn