Kısmet-i Askeriye Mahkemesi 19 Numaralı Sicil (H. 1109-1110 / M. 1698-1699) cilt: 58, sayfa: 653 Hüküm no: 513 Orijinal metin no: [121a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Vefat eden Hasan Bey’den kalan evin tek sahibi hanımı Fatıma olduğundan kız kardeşi Emine’nin müdahale etmemesi Husûs-ı âti’l-beyânın mahallinde istimâ‘ ve tahrîri iltimâs olunmağın savb-ı şer‘den me’zûnen irsâl olunan İmâmzâde Mehmed Efendi b. Ahmed Efendi sâbıkā Baltacılar Kethüdâsı olan fahrü’l-akrân el-Hâc Musa Ağa b. Abdülmuttalib’in mahmiye-i İstanbul’da Mercan Ağa mahallesinde sâkin olduğu menzile varıp zeyl-i vesîkada muharrerü’l-esâmî Müslimîn huzûrlarında akd-i meclis-i şer‘-i nebevî eyledikde mahalle-i mezbûre ahâlîsinden olup tarîk-i hacc-ı şerîfde vefât eden müteveffâ el-Hâc Hasan Bey b. İbrahim b. Ali’nin verâseti zevce-i menkûhası Fâtıma bt. Abdullah ile li-eb kız karındaşı Emine’ye ve li-eb er karındaşı el-Hâc Mustafa’nın oğulları Hüseyin ve Mehmed ve İsmail ve Yusuf’a münhasıra olduğu şer‘an zâhir ve mütebeyyen oldukdan sonra zâtı Hüseyin Efendi b. el-Hâc İsmail ve Bevvâb el-Hâc Mehmed b. İbrahim ta‘rîfleriyle mu‘arrefe olan mezbûre Emine Hatun meclis-i ma‘kūd-ı mezkûrda zâtı ta‘rîf-i şer‘î ile mu‘arrefe olan işbu sâhibü’l-kitâb mezbûre Fâtıma Hatun mahzarında üzerine da‘vâ ve takrîr-i kelâm edip mahalle-i mezbûrede vâki‘ bir tarafdan Kapıcılar Kethüdâsı Mustafa Ağa tasarrufunda vakıf menzile ve iki tarafdan Mahmud Ağa menzili ve bahçesine ve bir tarafdan tarîk-i âmma müntehî fevkānî üç bâb oda ve bir matbah ve bir hamam ve bahçe ve bir mikdâr arsa-i hâliye ve kenîf ve iki dükkânı müştemil menzil-i müteveffâ-yı mezbûrun terekesinden olan menzil-i mezbûrun nısfı bana mevrûs olmuş iken mezbûre Fâtıma Hatun menzil-i mahdûd-ı mezbûra müstakılleten mülk ve hakkı olmak üzere bi-gayr-ı hakkın vaz‘-ı yed eder suâl olunsun dedikde gıbbe’s-suâl mezbûre Fâtıma Hatun cevâbında menzil-i mahdûd-ı mezbûr müstakılleten benim mülk ve hakkım olup müteveffâ-yı mezbûr Kapıcı Hasan Bey b. İbrahim b. Ali hâl-i kemâl-i sıhhatinde Mekke-i mükerremede -şerefehallâhu- menzil-i mahdûd-ı mezbûrda ve içinde mevcûd olan cemî‘ eşyâda benim kat‘an alâka ve medhalim yokdur, zevce-i mezbûre Fâtıma bt. Abdullah’ın mülk ve hakkı ve hakk-ı sarfıdır deyü mahzar-ı Müslimîn’de ikrâr ve işhâd etmekle benim mülkümdür deyü def‘le mukābele edicek gıbbe’l-istintâk ve’l-inkâr mezbûre Fâtıma’dan def‘-i mezkûruna muvâfık beyyine taleb olundukda udûl-ı Müslimînden ve Saray-ı atîk-i sultânî serdârlarından Küçük Sakābaşı el-Hâc Süleyman Ağa b. Mehmed ve el-Hâc Osman Ağa b. Ali nâm kimesneler li-ecli’ş-şehâde meclis-i ma‘kūd-ı mezbûra hâzırân olup isre’l-istişhâd fi’l-vâki‘ mezbûre Fâtıma’nın zevci müteveffâ-yı mezbûr Kapıcı Hasan Bey b. İbrahim b. Ali hâl-i kemâl-i sıhhatinde mevzi‘-i mezbûrda zikr olunan hudûd ile mahdûd menzil ve içinde mevcûd olan cemî‘ eşyâda kat‘an alâka ve medhalim yokdur, zevcem mezbûrenin mülk-i mahzı ve hakk-ı sarfıdır deyü bizim huzûrumuzda ikrâr ve bizi işhâd eyledi, biz bu husûsa bu vech üzere şâhidleriz şehâdet dahi ederiz deyü her biri edâ-i şehâdet-i şer‘iyye edip ba‘de’t-ta‘dîl ve’t-tezkiye şehâdetleri makbûle olmağın mûcebiyle ba‘de’l-hükm vâki‘ hâli mevlânâ-yı mezbûr mahallinde ketb ü tahrîr ba‘dehû ma‘an ba‘s olunan el-Hâc Süleyman b. Abdullah ve Hasan b. Abdullah meclis-i şer‘a varıp vukū‘u üzere inhâ ve takrîr etmeğin mâ-vaka‘a kayd şüd. Fî 9 min-Cumâdelûlâ sene 1110. Şuhûdü’l-hâl: el-Hâc Ali Ağa b. Abdülmuttalib, el-Hâc Cafer Ağa b. Derviş, Mustafa Ağa b. Hüseyin, Bevvâb İdris Bey b. Süleyman, el-Hâc Hüseyin mühürdâr, Mehmed b. Ahmed, Ahmed Bey b. Mustafa bevvâb, el-Hâc Mehmed b. İbrahim, Ebubekir ağa b. Mehmed